Polar Seafoodip kilisaataani Frederikshavnimiittumi hashimik 4 kiilumik nassaartoqartoq
Danmarkimi kilisaammi raajarniummi Kalaallit Nunaaliariartulersumi sisamanngornermi nalinginnaasumik nakkutilliilluni misissuineq ikiaroornartumik anngajaamik nassaarnermik kinguneqarpoq.
Akileraaruserinermi aqutsisoqarfiup Toldstyrelsenip qimmia ikiaroornartunik misissuisartoq kalaallit kilisaataanni raajarniummi Frederikshavnimi umiarsualivimmiittumi hashimik 4 kiilumik nassaarpoq. Taama Nordjyske tallimanngornermi allappoq.
Polar Seafoodip pisortap Bent Sallingip Sermitsiaq.AG-mut uppernarsarpaa, ingerlatseqatigiiffiup kilisaataa raajarniut Polar Nataarnaq pineqartoq.
- Suliaq ajoraluartumik oqaaseqarfigisinnaanngilara politiit maannakkorpiaq paasiniaavigimmassuk, Bent Salling oqarpoq.
Suli pasisaqartoqanngitsoq
Akileraaruserinermi aqutsisoqarfik Toldstyrelsen Nordjyske naapertorlugu ikiaroornartumik 4 kiilumik kilisaammi eqqakkanut containerimi nassaarsimavoq.
- Inuttat 14-it oqartussanit nalunaarsoneqarput, kisianni hashi 4 kiilu kimilluunniit ilisimasaqarfigiumaneqanngilaq, kriminalassistent Anni Brix Nordjyskemut oqarpoq.
Suliami suli pasisaqartoqanngitsoq, politiit paasissutissiipput.
Nassaarnerup kinguninnguatigut kilisaat aallarsinnaanngorpoq Kalaallit Nunaatalu tungaanut ingerlaalerluni.
Marinetraffic naapertorlugu kilisaat Norgep kitaata avataatigut maanna avannamut ingerlaarpoq.
Frederikshavnimi akileraaruserinermi oqartussat hashimik Kalaallit Nunaaliariartulersumik aatsaat siullermeerlutik nassaanngillat.
Politiit siorna juunimi Royal Greenlandip kilisaataani Avatami Frederikshavnimi hashimik 21 kiilumik arsaarinnissuteqarput.
