ukiumut naatsorsuutit
Polar Seafoodip aningaasaliinissat annertuut unitsikkallarpaat
Aalisarnermut sinaakkutit atugassarititaasut qularnarnerisa suliffeqarfik namminersortoq Polar Seafood aningaasaliinissamut unikaallatsippaat. Aktiaateqartut ukiormanna iluanaarutinit akilerneqassanngillat.
Polar Seafoodip ullumi sisamanngornermi ataatsimeersuaqqammerpoq, tassanilu naatsorsuutit patajaatsut kaaviaartitaqaleriartuinnartut, kisianni sinneqartoorutit appariartornerannik takutitsisut saqqummiuppaat, tamanna raajat akiisa appariartornerinik pissuteqarpoq.
Politikkikkut sioorasaarutit
2015-imut sanilliullugu sinneqartoorutit 68 millionit koruuninik ikinnerupput, katillugulu 266 millionit koruuniullutik. Illuanik kaaviiaartitat 100 millionit missaannik amerleriarput, 3,1 milliardit koruuninngorlutik.
Naak siulersuisuni siulittaasup Henrik Lethip naatsorsuutit naammaginarneraraluarai, aktiaatillit iluanaarutinit pissarsissanngitsut ataatsimeersuarnermi aalajangiunneqarpoq. Nunatsinni aalisarnermut sinaakkutit atugassarititaasut qularnarnerat nassuiaatigineqarpoq.
- Ulluni makkunani ajoraluartumik malunnarpoq, suliffeqarfinnik ingerlatsiniarnitsinni atugassarititaasut politikkikkut ilaatigut ajornerulersinniarneqartut. Ingammik raajanik aalisakkanillu pisassiissuteqartarnermi allannguuteqarnissamik Naalakkersuisut aarlerisaarinerat, siunissami aningaasaliissuteqarniarnermi nalornisoortitsivoq. Taamaammat piffissaatillugu silatusaartariaqarpugut, siunissamilu pisassiissuteqartarnermut atatillugu pissutsit qulakkeernissaat tikillugu, Kalaallit Nunaanni aningaasaliissutissat annertuut aalajangerneqareersut unitsinneqarallartariaqarlutik. Ataatsimeersuarnermi taamaammat aalajangerneqarpoq, ukioq manna sinneqartoorutinik piginneqataasunut agguaassisoqarani suliffeqarfiup isumannaallisarneqarnissaanut sinneqartoorutit atorneqassasut, siulersuisuni siulittaasoq tusagassiuutinut nalunaarummi ilisimatitsivoq.
Suliffippassuarnik pilersitsisut
Suliffeqarik ukiunik qulini kingullerni Kalaallit Nunaanni suliffippassuarnik pilersitsisimasoq, Henrik Leth ilisimatitsivoq.
- Suliffeqarfittut soqutigisarisagut pingaarnerit Kalaallit Nunaanniimmata, Nunatsinni suliffissat piujuarnissaat inerisarnissaallu soqutigisaraarput. Polar Seafoodip 2016imi inuit 997it sulisorai, 2015imi 913it sulisorinikuullugit. Kalaallit Nunaanni namminersortut Suliffeqarfiutileqatigiit annersaata siulersuisuini, inuiaqatigiinnut akisussaassuserput ilisimaaraarput, sulilu ilungersuunerorusullugu. Oqareernittulli aalajaatsunik atugassaqarnissarput kissaatigaarput, Henrik Leth naggasiivoq.
Sulisut Kalaallit Nunaata avataani inissisimasut 2016-ip ingerlanerani nikinngillat.
Ukiumut naatsorsuutini kisitsisit pingaarnerit - kisitsisit 2015-imeersut ungalullit
- Akileraannginnermi sinneqartoorutit: 266 mio. kr. – (335 mio. kr.)
- Kaaviiaartitat: 3,1 mia. kr. – (3,0 mia. kr.)
- Sinneqartooruteqarsinnaassuseq: 7,7 procent
- Pigisat: 1.320 mio. kr
- Nunap karsianut ilanngussat: 305 mio. kr. – (316 mio. kr.)