Polar Seafoodimik piginnittut pisuujunerpaat 100-t akornanniittut

Anders Brønsip Jens Sallingillu pigisaat aviisip Berlingske Businessip ukiut tamaasa danskit pisuujunerpaat 100-t pillugit allattortagaani nummer 96-itut 97-isutullu inissisimapput.

Polar Seafood Greenlandimik piginnittut Jens Salling aamma Anders Brønsip kinguaavi Danmarkimi pisuujunerpaat 100-t pillugit Berlingske Businessip allattortagaani suli takuneqarsinnaapput.

Berlingske Business naapertorlugu, taakku tamarmik immikkut 1,6 milliarder koruuninik aningaasaateqarput.

Raajarniartartut taakku pisoorsuit allattorsimaffianni aatsaat ilaalinngillat.

Anders Brøns Nuummeersoq Jens Sallingilu Qeqertarsuarmeersoq pisuujunerpaat 100-t allattorsimaffiannut siullermeerlutik 2016-imi ilaalerput, ukiulli tulliani marluullutik allattorsimaffimmiikkunnaarsimallutik.

2018-imi allattorsimaffimmi takussaaqqilerput, taamanikkullu "taamaallaat" 1,4 milliarder koruuninik aningaasaateqarlutik, maannali taakkunannga amerlanerungaartunik aningaasaateqarput.

Kinguaariit nikerartut

Polar Seafoodimi kinguaariit nikeraleruttorput, ilaatigut suliffeqarfik ullualunnguit matuma siorna marlunnik nutaanik pisortamut tullersortertaarput.

Miki Brøns ingerlatseqatigiiffiup qullersaqarfiani allaffissornermut, pisassiissutinut akuersissutinullu akisussaaffeqalerpoq, Bent Salling Polar Seafoodip aalisariutaataasa ingerlanneqarnerinut pingaarnertut aksisussaasuulerluni.

Miki Brøns Anders Brønsip 2018-imi toqukkut qimaguttup erneraa, Bent Salling Polar Seafoodimik piginnittup pisortallu Jens Sallingip erneralugu.

Lego suli peqarnerpaasoq

Danmarkimi pisuujunerpaat 100-t allattorsimaffianni kisitsisit pisuussuterpianut tunngassuteqanngillat, Danmarkimili Kalaallillu Nunaanni ingerlatseqatigiiffiit 1.700-t piginnittui naatsorsuutaallu pillugi misissuisimanermit nalilerluarneqarnerpaasimasut pillugit allattugaallutik.

Pisuussutinik nalilersuinermi tunngaviusarput pigisat nalillit niunermi qanorlu inooriaaseqarnermi qanoq naleqartigineri, tassa piginnittut piviusunngortitsiniarlutik aalajangeraangata.

Danmarkimi pisuujunerpaat 100-t 2020-mi allattorsimaffianni nr. 1-itut inissisimapput Ilaqutariit Kirk Kristiansenikkut, taakku Kirkbi aamma Lego pigisaraat, ataatsimut 261,4 milliarder koruuninik nalillit.

Powered by Labrador CMS