Polar Seafoodimik piginnittut aningaasaateqarnerpaat allattorsimaffianni siuariartut
Jens Kristian Friis-Salling aamma Miki Brøns Kunngeqarfimmi pisuujunerpaat 100-t allattorsimaffianni normu 92-itut normu 93-itullu inissisimapput.
Suliffeqarfiutillit taakku marluullutik Kalaallit Nunaanni pisuujunerpaajugunarput, taakkulu marluullutik aningaasaatitik miliuuninik hunnorujulikkaanik amerlanerulersissimmavaat.
Økonomisk Ugebrevimit naatsorsuisoqarsimanerata tamanna takutippaa, Danmarkimi inuit pisuujunerpaat 100-t allattorsimaffiat marlunngornermi saqqummiunneqarpoq. Allattorsimaffik siusinnerusukkut Berlingskemit suliarineqartarsimavoq.
Jens Kristian Friis-Salling allattorsimaffimmi inissisimanerminit tallimanik siuariarluni normu 92-itut inissisimalersimavoq, Miki Brønsilu aamma inissisimanernit tallimanik siuariarluni normu 93-itut inissisimalersimalluni, Miki Brøns ataatami Anders Brønsip 2018-imi toqunerata kingorna ataatami suliffeqarfiutaani aqutsisunngorsimavoq.
Økonomisk Ugebrevimit nalilerneqarsimavoq, Friis-Salling to milliarder koruuninik aningaasaateqartoq, Miki Brønsilu (Anders Brønsip pigisai naapertorlugit) 1,9 milliarder koruuninik aningaasaateqartoq.
Ilaqutariit Legotillit pisuujunerpaasut
Kalaallit Nunaanni pisuujunerpaat taakku marluk ingerlatseqatigiiffiutertik Polar Seafood aqqutigalugu aalisarnermikkut aningaasarpassuaateqalersimapput.
Savalimmiormiut aamma allattorsimaffimmiituutitaqarput, tassani Johan Regin aamma Oddvør Jacobsen ingerlatseqatigiiffimmik Bakkafrostimik piginnittuusut kapisilinnik tukertitsisartuupput. Taakku marluullutik allattorsimaffi normu 34-tutu 35-tullu inissisimapput.
Ilaqutariit Legotillit Kjeld Kirk Kristiansenimik siuttullit Kunngeqarfimmi pisuujunerpaat allattorsimaffianni qullersaapput.
- Danmarkimi pisuujunerpaanit 100-sunit ilaqutarii Kirk Kristiansenikkut LEGO-tillit pisuussutsit tamarmiusut 30 procentiisa missaannik pigisaqarput: tassalu 322 milliarder koruuninik, Økonomisk Ugebrev allappoq.
Økonomisk Ugebrevimit ilisimatitsissutigineqarpoq, Danmarkimi pisuujunerpaat 100-t allattorsimaffianni aningaasaatigineqartutut allanneqarsimasut eqquissortuunngitsut, ingerlatseqatigiiffinnilli 1.500-nit amerlanerusunit piginnittuni pissutsit naatorsuusiarineqarsimasullu misissoqqissaarneqarsimanerannit nalilerneqarsimasut.