Polar Seafoodimi sulisut 1000-t pallippaat
Kaaviiaartitat 40 millioninik 3,28 milliardit koruuninut apparialaaraluartut, suliffeqarfissuaq Polar Seafood 2018-imi akileraareernermi 155 millionit koruuninik angusaqarpoq, ukiup siuliani 117 millionit koruuniusut.
Polar Seafood Greenlandip ukiumut naatsorsuutit inerneri saqqummiuteqqammerpai, taakku arlalitsigut rekortiliiffiupput.
Angusat marluk annertuut
Suliffeqarfissuup siorna sulisut 1000-nit amerlanerusut sulisorai, tassa 1.032-t 2017-imi 965-iusut, Kalaallit Nunaannilu suliffeqarfiit namminersortut annersaanni aningaasat nammineq pigisat siullermeerlutik 1,5 milliardit koruunit anguaat – tassa: 1.666.721.000 koruunit.
Pisortat nalunaarutaanni naatsorsuutit annertuuliarinagit ”naammaginartutut” oqaatigineqarput.
Naatsorsuutit pisortat 2018-imut naatsorsuutigisaannut naammassinnipput ”naak ukiumi tassani Kalaallit Nunaannut pisuussutinut akitsuutit qaffariangaatsiaraluartut”, nalunaarummi tamanna allaqqavoq.
2019-imut naatsorsuutit
Ukiumi matumani angusanut naatsorsuutit 2018-imi angusanut naleqqupput, ”suliat 2018-imut sanilliullugu 5-10 procentinik annikillinissaat naatsorsuutigineqarluni”.
Ilanngaatit ilanngaatigereerlugit kaaviaartitat ima agguataarneqarput (2017):
Nettoomsætningen fordeler sig således (2017):
- Kalaallit Nunaat aamma Danmark: 608 mio. kr. (598)
- Europa: 2.102 mio. kr. (2.059)
- Kangia: 504 mio. kr. (556)
- Sinneri: 66 mio. kr. (106)
- Suliffeqarfiup kaaviiaartitaanit 81 procentit nunanit allaneersuupput, Kalaallit Nunaanneeratik aamma Danmarkimeeratik, amerlanersaat Europami nunanit kiisalu Europap kangianit aamma Asiamit, ingerlatseqatigiiffik ilisimatitsivoq.
Angusat pitsaanerpaat ilaat
- Angusat Polar Seafoodip oqaluttuarisaanerani pitsaanerpaanut ilaasut, naatsorsuutigisanit annertunerupput, saniatigummi umiarsuarnut nutaanut annertuunik aningaasaliisimavugut minnerunngitsumillu nunatsinni aalisakkerivitsinnik pitsanngorsaasimalluta, Henrik Leth naatsorsuutinut atatillugu saqqummiussaqarnermini oqarpoq.
- Tassa sipaaruteqarnikkut angusat annertussusiat pilersinneqanngilaq. Anguneqarput periusissianik tatiginnillu ingerlatsinikkut, nunarsuarmi niuerfiusunik uummaarisumik malinnaanikkut periarfissanillu piviusorsiortumik nalilersuinikkut. Oqartoqarsinnaavoq angusat pinngortut aalaiangiisinnaassuseqarnermik mianersornermillu suleqatigiissitsilluarnikkut, aamma aaqqissuussaanikkut eqaassuseqarnikkut kiisalu ingerlatsivigisattai luini allannguutinut naleqqussartarnikkut, siulersuisunut siulittaasoq taama itisiliivoq.
Iluanaarutisititsisoqanngitsoq
Ingerlatseqatigiiffik piginneqataasunut iluanaarutisitsinngilaq, aammalu iluanaarutit kalaallinut inuiaqatigiinnut tunniussimasai isiginiarneqarsimapput.
- Akileraarutit, akitsuutit, iluanaarutisianit akileraarutit suliffeqarfiullu akileraarutai 2018-imi 343 million koruuniupput, tassalu ukiup siulianut sanilliullugit 53 million koruuninik qaffassimallutik. Suliffeqarfittut akileraarutit immikkut qiviaraanni, taakku 46 million koruuniupput, taamallu suliffeqarfiup akileraarutai nunatsinni suliffeqqarfiit akornanni qaffasinnerpaanut ilaallutik, ingerlatseqatigiiffimmit tusagassiuutinut nalunaarummi tamanna atuarneqarsinnaavoq.
Pisortat nalunaarutaanni ingerlatseqatigiiffiup pilersitseqataasuata Anders Brønsip decembarimi 2018-imi alianartumik pisoqarneratigut toqunera oqaatsimik ataatsimik eqqaaneqanngilaq, tamanna suliffeqarfimmiinnaanngitsoq, kalaallini inuiaqatigiinnit tupatsitsivoq.
Siulersuisunut ilaasortanut ernera Miki Jonas Brøns ilannguppoq, pisortarlu ataasiinnaavoq, Jens Kristian Friis-Salling, Henrik Leth suli siulersuisunut siulittaasuniilluni.