Polar Seafood: Anders Brønsip atorfii ernerata kingoraassavai
Miki Brønsip, Polar Seafoodimi Anders Brønsip siulersuisuni ilaasortaaffii aamma piginneqataassutai, tassanngaannaq toqunerata kingorna tigussavai.
Pilersitsisup Anders Brønsip tallimanngormat kingullermi tassanngaannaq toqunerata kingorna, Polar Seafoodip siunissaa allanngussanngilaq. Siulersuisuni siulittaasoq Henrik Leth tusagassiuutinut nalunaarummi taama ilisimatitsivoq.
Anders Brønsip alianaqisumik toqukkut qimagunnerani tupinnanngitsumik amerlasuunit eqqarsaatigineqarpoq, Polar Seafoodimut suliffippassuarnullu tamanna qanoq sunniuteqarumaassanersoq.
Siulersuisuni ilaasortaaffiit piginneqataassutillu
- Taamaattumik aaliangersimavoq Miki Brønsip suliffeqarfissuarmut ilaqutariit soqutigisarisaat taakku sinnerlugit tigummisarilissagai aammalu ataatami Polar Seafood Greenland A/S-imi aammalu Polar Seafood Denmark A/S-imi siulersuisuni issiavii tigussagai, suliffeqarfissuup siulersuisuini siulittaasoq, Henrik Leth, taama allappoq.
Taamaattumik toqunerata kingorna kingornutassat inissippata, aaliangerneqareersimavortaaq, Miki Brønsip Polar Seafood Denmark A/S-imi piginneqataassutsit pigilissagai, siulittaasoq ilisimatitsivoq.
Toquneranit sunnerneqassanngitsoq
Henrik Lethip ilisimatitsissutigaattaaq, Anders Brøns siunissamut isigaluni eqqarsartartuusoq naluneqanngitsoq, ilisarnaatigisaasalu ilagigaat suliffeqarfiup piffissaalluartillugu siunissaanik eqqarsaateqareersimanera.
- Tamatumunngalu atatillugu ilisimatitsissutigisinnaavara, testamentiliamini eqqarsaatigereersimammagu, Polar Seafoodip ingerlanneqarnera peerunnermini sunnerneqassanngimmat, taanna oqarpoq.
Anders Brønsip ukiorpassuarni suleqataata Jens Friis Sallingip pisortaanertut inissisimanera kingoraassavaa.