Polar Seafood uku ingerlateqqissavaat
Polar Seafood Greenlandimi ukiut arlaqanngitsut qaangiuppata kinguaariinni nikittoqassaaq. Piginneqataasoq aamma pisortaq Jens Salling Sermitsiaq.AG-mut taama ilisimatitsivoq.
Kinguaariit nikinnissaannut pilersaarut Anders Brøns peqatigalugu taassuma siorna decembarimi alianaqisumik toqunera sioqqutilaarlugu aalajangiunneqarpoq.
Aviisi Sermitsiaq Jens Sallingimik apersuisoq taama allaaserisaqarpoq, taanna maanna – kisimi – Polar Seafoodip ullersaqarfiani aqutsisuuvoq.
Jens Sallingip piffissaq eqqorlugu oktobarimi/novembarimi 2018-imi Polar Seafoodip siunissaa pillugu apeqqut ikinngutiminut aamma ukiorpassuarni suleqatiminut Anders Brønsimut eqqarsaatini oqaluuserisassatut qaqippaa.
Anders Brønsip alianaqisumik Aalborgimi Umiarsualivimmi ipilluni ajunaarnerata unnukkuani kinguaariit nikinnissaat oqaluuserineqarpoq, Jens Salling oqaluttuarpoq.
Ukiunut tallimanut pilersaarut
Anders Brønsip ernera Miki ullumikkut allattoqarfimmi sulivoq, Jensillu ernera Bent ingerlatsiviup umiarsuarnut pilersuinermullu immikkoortoqarfiani sulilluni.
– Nukappissat taakkua marluk ingerlatsineq tigussavaat. Anders uangalu isumaqatigiissimavugut ukiuni tallimani ingerlatsivik annertunerusumik ilinniassagaat, taava uagut immitsinnut soraarninngortissinnaavugut 75-inik ukioqalerutta, Jens Salling paasissutissiivoq, ullumikkullu pisortatut akisussaaffik kisimiilluni tigummivaa.
– Qularutiginngilara pilersaarusiarput eqqortuusoq. Nukappissat pikkorissuupput, ilimanarporlu naggataatigut suliassat akunnerminni agguataarumaaraat Andersip uangalu suliassanik agguataarisimanitsinnut assingusumik, Jens Salling siulittuivoq.
Jens Sallingip apersorneqarnera aviisimi Sermitsiami atuaruk – uani ataani linki aqqutigalugu isissutissarsigit: