Skip to main content

Polar Seafood tapiissutinut qujaannartoq

Suliffeqarfimmut Polar Seafooditut ittumut aalisarnermut ikiorsiissutit atorneqassanngitsut, pisortaaneq Jens Salling isumaqarpoq.

Aalisarnermut ikiorsiissutit Naalakkersuisut septembarip qiteqqunnerani atuutsiligaat, sinerissamut qanittumi raajarniarlutik, saattuarniarlutik saarullinniarlutillu aalisartunut atugassiaapput, coronap ajornartorsiortitsinera pissutigalugu akitigut 10 procentimik annaasaannut matussutissatut.

Akitigulli annaasat siulliit 15 procentii pineqanngillat, akerlianilli kingusinnerusukkut annaasat 10 procentii pineqarlutik.

Polar Seafoodili ikiorsiissutinik pisariaqartitsinngilaq, tusagassiorfinnut nalunaaruteqarnermi oqaatigineqarpoq.

- Polar Seafood Greenlandimi pisanik tunisinermi tapiissutinut, aalisarnermik ingerlatsisut
allat inuiaqatigiillu pisariaqartinnerusaannut, qujaannarnerput, immitsinnut
naammagisimaarnermik tunngaveqarnani qujamasunnermik aallaaveqarpoq, piginneqataasoq pisortaanerlu Jens Salling oqarpoq.

Aalisarnermut tarpersersuineq pitsaasuusoq

Taassuma oqaatigaa, piffissami ajornartoorfiusumi aalisarnermut aningaasatigut tapiissuteqarneq pisariaqarluinnarsinnaasoq..

- Taamaattumik Namminersorlutik Oqartussat pisanik tunisinermi tapiissuteqarnissamik, Nunatsinni inuussutissarsiutit pingaarnersaannut patajaallisaataasussamik, neqerooruteqarnerat Polar Seafoodimit qujaruteqaarput.

- Naak uagut ingerlatsivitsinni tapiissutinik pisariaqartitsinngikkaluarluta, aalisarnermik
ingerlatsisut allat pisariaqartitsinerat akuerilluinnarparput, taanna allappoq.

Tnuitsiviit tapiissutinik aalisartunut tunniussaqartussaapput, tamatumalu kingorna aningaasat Namminersorlutik Oqartussanit utertinneqassallutik.

Polar Seafoodip tapiissutissat aggustimi septembarimilu tunniunneqartussat naatsorsorsimavai. Tassungalu atatillugu paasisimavaa, namminneq saattuarniartartutik raajarniartartutillu tapiissutissat tamarmiusut affaasa missaannik pissarsisussaasut. Suliffeqarfik Sermitsiaq.AG-mut ilisimatitsivoq.

Siusinnerusukkut ajornartorsiortarsimasut

Suliffeqarfilli ukiuni kingullerni patajaallisarneqarsimavoq, allaat tapiissutinik pissarsinngikkaluarluni coronap ajornartorsiortitsinera qaangersinnaallugu, isumaqaramimmi sumiiffinni allani tapiissutit pisariaqartinneqarnerusut.

- Polar Seafoodimiit ukiorpassuarni Kalaallit Nunaanni aalisarnermik inuussutissarsiornerup patajaallisarneqartuarnissaata pingaaruteqarnera erseqqissartuarparput. Minnerunningitsumik ajornartoorfinni ingerlatsiviit aningaasatigut toqqammaveqarnerat akiliisinnaassuseqarnerat eqqarsaatigalugu, nunarsuarmi pisut allanngorartuarnerinik qaangiisinnaanermut pingaaruteqaqimmat. Maannakkorpiarmi tamanna misigaarput, Jens Salling oqarpoq.

Taassuma oqaatigaa, corona kisimi aalisarnermik inuussutissarsiuteqartunut unammillernartitsinngitsoq.

- Soorunami Covid-19-p pilersitaanik nunarsuarmi nappaalanerup nassataanik
tassanngaannartumik immikkuullarissunillu ajornartorsiortoqarpoq, eqqaamassavarpulli
siusinnerusukkut ajornartorfiit misigisareeratsigit, taamaattoqartuassaarlu. Pisumilu tassani
akissut tassaavoq patajaallisaaneq, naggasiilluni oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER