Polar Seafood peqqinnissaqarfimmut millioninik tunissuteqarpoq

Coronavirusip anigorneqarnissaanut siunnertaqartumik Polar Seafood peqqinnissaqarfimmut aningaasanik tunniussivoq

Polar Seafoodip pisortaanera Jens Salling

Corona-virus tunillaassuuttoq nunarsuarmut sukkasoorujussuarmik siaruaappoq, maannalu aamma Kalaallit Nunaat eqqugaavoq, tassami maanna inuit marluk tunillatsissimasut paasineqareerpoq.

Maanna Polar Seafood peqqinnissaqarfimmut 2 millioninik tunissuteqarpoq.

- Tamavitta Coronamit eqqorneqarsinnaavugut, taamaattumillu siaruaannissaata killilersimaarnissaa kinguarsarnissaalu tamatta annertuumik soqutigisaraarput, Polar Seafoodip pisortaanera Jens Salling oqarpoq.

- Peqqinnissaqarfitsinnut, naammattunik isumagisassaqareeqisumut, tamanna immikkut aningaasatigut piumasaqaatitaqarpoq. Aalajangerpugullu immikkut teknologimut atorneqartussanik 2 million kroninik tunissuteqarniarluta, oqarpoq.

Aningaasat sumut atorneqarnissaat peqqinnissaqarfimmit nammineq aalajangerneqassasoq oqaatigaa.

- Ilisimavarpulli Danmarkimi tuniluuttumik nappaalanerp takkuteriataartup nassataanik napparsimaveqarfiit peruluttunut immikkoortortaannut unitsinneqartut amerlaqimmata, assersuutigalugu anersaartuutinik pisiortornissaq pisariaqartinneqalersoq. Kalaallit Nunaannilu tamanna aamma atuutilissappat, atortunut teknologimut atugassanut pisortanit aningaasaliissutinik akuersissuteqarnissamut utaqqineq peqqutaalluni kinguarsaasoqannginnissaanut uagut peqataarusuppugut, oqarpoq.

- Tamatta inuiaqatigiit unittuunnginnissaat eqqarsaatigalugu inuussutissarsiornerup sapinngisaq tamaat tamakkiisumik, allarpassuartigullumi, ingerlajuarnissaa soqutigisaraarput, Polar Seafoodip pisortaanera oqarpoq.

Powered by Labrador CMS