Polar Seafood nutaanik ilinniartuuteqalerpoq
Polar Seafood imarsiornermi ilinniartussanik nutaanik aallartitsivoq. Ilinniartut katillugit aqqanillit aallartipput.
Aallartittut taaguuserneqarput aspiranthold 2, inuusuttullu ilinniartunngortut tamarmik Polar Seafoodip umiarsuaataanni sulisooreerlutik.
Polar Seafood tusagassiutinut nalunaarummini allappoq.
Ilinnialertut aqqanillit ukunani ilinniassapput:
- Tallimat Nuummi Imarsiornermik Ilinniarfimmi ilinniassapput, aquttutut angallatilluunniit naalagaattut ilinniagaqassallutik.
- Pingasut Aarhusimi maskinmesterinngorniarfimmi atuassapput.
- Pingasullu Holstrebromi fiskeriteknologi/logistikip inuussutissanillu paarsineq pillugu ilinniakkamik aallartitsissallutik.
Amerlanerit ilinniartinneqassapput
Polar Seafoodip 2016-imi immikkut imarsiornermik ilinniartitsisarneq aallartippaa., suliffeqarfillu maannamut angallatip naalagaanik 1. grad-imik ataatsimik, angallatip naalagaanik 3. grad-inik pingasunik kiisalu fiskeriteknologi/logistikip inuussutissanillu paarsineq pillugu ilinniagartuumik ataatsimik ilinniartitsisimalereerpoq. 2016-imi aallartittut sinneri suli ilinniakkaminnik ingerlatsitsisut, Polar Seafood nalunaarummini ilisimatitsivoq.
- Imarsiornermik immikkut ilinniartitsinerup siunertaraa kalaallit amerlanerit imarsiornerup iluani ilinniagaqalernissaat, tamannalu piffissap sivikitsuinnaap iluani ingerlallualersimavoq, Polar Seafoodimiit Jens Jørgen Egede, tusagassiutinut nalunaarummi allappoq.