Aalisarneq

Polar Seafood Norgemi siuariartortoq

Fabrikki ukiuni arlalinni naatsorsuutimini amigartoortareerluni qajannaatsumik sinneqartoorpoq

Polar Seafoodip fabrikkia Berlevågimi Barentshavep eqqaaniittoq, ukiuni arlalinni amigartoortareerluni ineriartorneq mumisillugu sinneqartooruteqarpoq. Norskit aviisiat Finnmarken, taama allappoq.

2009-mili aatsaat sinneqartooqqittoq
Fabrikki 2015-imi 9,5 millionit norskit koruuniinik (7,4 millionit koruunit) akileraannginnermi sinneqartoorpoq.

Fabrikki 2009-mili sinneqartooruteqarsimanngilaq, 2012-milu naatsorsuutit 7,1 millionit norskit koruuniinik amigartoornermik takutitsipput.

Taarsigassat ikinnerusut
Tunisassiorfik 2015-imi ingerlatsinermi 138,2 millionit norskit koruuninik isertitaqarpoq, tamannalu ukiumut siulianut sanilliullugu 35 millioninit koruuninik amerleriarneruvoq. Tassanngaanniillu nammineq aningaasaatit amerlisarneqassapput, taarsigassallu annikillisarneqarlutik.

Fabrikkimi pisortap Trygve Åvestadip aviisiimi erseqqissarpaa, najukkami sulisut, aalisartunut qanimut suleqateqarneq aamma minnerunngitsumik 2011-mi nutaamik fabrikkiliornerup ineriartornermut mumisitseqataapput.

Powered by Labrador CMS