Polar Seafood Danmarkimi nipisat suaannik nutaanik tuniniaapput
Nunatsinni nipisat suaasa naleqarnerulernissaat siunertaralugu, Polar Seafood ukioq manna nipisat suaannik nutaanik timmisartukkut Danmarkimut nassiussillutik misiliipput, tassani niuertumut suannik tigusisussamik isumaqatigiissusioreersimapput.
Sapaatip akunnerini marlunni kingullerni Polar Seafood marloriarluni Danmarkimut timmisartukkut nipisat suaannik nutaanik nassiussivoq. Suaat nalinginnaasunik suliffeqarfissuarmut suannik puiaasanut asiunaveersaaserlugit nioqqutissiortartunut nassiunneqartarput, kisianni maanna suaat nutaajutillugit tunineqarput.
- Alloriarneq una siulliullunilu ilinniarfiuvoq. Niuerfik nutaajuvoq, pissutsillu arlallit pissutigalugit nassiunneqartarnerinut qularnaatsuutitsinermut sunniuteqarput, assersuutigalugu sila aamma timmisartunut tunngatillugu teknik, Polar Seafoodimi pisortaq, Bent Salling, Sermitsiaq.AG-mut oqarpoq.
Misiliineq siunissami nipisat suaannik nutaanik tuniniaanermi niuerfiit nutaat qanoq tikinneqarsinnaanerannik paasisaqarnissamut tunngasoq, taassuma oqaatigaa.
- Pitsaanerpaamik qanoq nassiussinnaanerlugit, qanoq tunisinnaanerlugit, aamma naak anori silalu aamma timmisartut nassiussinermut sunniuteqarsinnaagaluartut qanoq atajuarnermik pilersitsisinnaanerput ilinniassavarput.
Siornatigut aalisakkanik nutaanik sinerissamit Danmarkimut nassiussisarnermik misiliisoqarnikuuvoq, kisianni timmisartut taamaatinneqarneranni aamma tunisat amigarnerannik unammillernartoqartitsivoq. Nuummi mittarfissuaq ammarpat unammilligassat amerlasuut atorunnaarnissaat naatsorsuutigineqarpoq.
Misiliineq siulleq pitsaavoq
Nassiussinermut tunngasut saniatigut aamma danskit nipisat suaataasa tuniniarneqalernerannit qaammatit arlallit qaangiuttut kalaallit aalisarnerisa aallartinneranni niuerfissaqarnersoq paasiniarneqassaaq.
Sapaatip akunnerini marlunni kingullerni nipisat suaannik marloriarluni nassiussisoqarpoq, tamannalu ingerlalluarsimasoq pisortaq oqaluttuarpoq.
- Niuerfimmik pilersitsiniarneq piffissamik atuiffiusarpoq, tamannalu pisinnaanersoq maanna takussavarput. Taamatut pisoqarsinnaanera ilimanarpoq, tassami pitsaassusaat naammagisimaarpaat. Taava annertunerusumik qanoq pilersitsisinnaanerluta aamma paasiniassavarput.
Nassiussat siulliit 150 kiiluupput, taakku kiilumut 120 koruuninik akilerlugit tunineqarput. Pitsaanerinnaat timmisartukkut nassiunneqarput, taakku annertuukkaarlugit tuniniarneqartartut akerlianik nutaajutillugit tuniniarneqartussaammata.
Siunissami aalisartunut naleqarnerulersitsissasut
Periutsimik nutaamik misiliinissamut kajuminneq niuerfimmik nutaamik neriuuteqarnermik tunngaveqartoq, Bent Sallingip oqaatigaa, siunissamilu nunatsinni aalisartut iluaqutigisinnaassagaat.
- Maanna iluanaaruteqanngilagut misiliinerunera pissutigalugu, kisianni siunissami tamanna neriuutigaarput aamma aalisartunut akiginnerulersitsisoqarnissaa. Uagutsinnut pingaarutilerujussuuvoq, tassami nunatsinni suliffeqarfinni namminersortuni annersaalluta niuerfinnik nutaanik ujartuinissamut akisussaaffimmik tigusivugut, aalisartullu nioqqutiminnut pitsaanerusunik akinik pissarsisinnaalissammata.
Niuerfiup qanoq annertutigilersinnaanera pisortap maanna oqaatigisinnaanngilaa, kisianni aalisarnerup nalaani ullormut 500 aamma 1000 kiilu akornanni mianersortumik missiliorpaa. Polar Seafood ukiumut 100 tonsinik nipisat suaannik tunisaqartarpoq.
Ukioq manna nipisanniarneq kinguaattoorluni 18. april aatsaat ammarneqaraluartoq, aalisarnermut piniarnermullu naalakkersuisoqarfiup sisamanngormat nalunaarutigaa, aalisarneq aqutsiveqarfinni arlalinni 6. maj matuneqalersoq, pisassiissutit tamakkerneqangajalernerat pissutigalugu.