Polar Amaroq ammassaqassutsimik misissuisoq

Polar Seafoodip aalisakkanik ikerinnarsiortunik kilisaataataa, Polar Amaroq, Islandip avataani ammassaqassutsimik biologit misissuinerannut, asuliinnaanngitsumik, peqataasimavoq.

Polar Amaqqup naalagaa, Geir-Zoega.

Islandimi aalisarnermik inuussutissarsiummi suliffeqarfiit arlalissuit Islandip, Kalaallit Nunaata Norgellu imartaanni ammassaqassutsimik qulaajaaniarsarinerat silaannarmit tigusaanngilaq. Polar Amaroq Islandimi Straumnesip avannaata kitaanit ammassaqassutsimik ujaasilluni aallartissimavoq tassanngaanniillu Island avannaqqullugu narlusuumik ingerlaqissimalluni. Sumiiffiullu misissuiffiginissaa pissutissaqarluarsimavoq, kilisaatinit ammassannik maluginiakkat arlalissuusimammata.

Paasissutissat

Immamik misissuisoqarfik, Havforskningsinstituttet, Europami imaani ilisimatusarnermik ingerlatsiviit. Ingerlatai pingaarnerit tassaapput ilisimatusarneq, siunnersuineq nakkutilliinerlu.

Misissuiartortullu asuliinnaq angalasimanngillat.

-Ilumoorporlu. Ammassannik tassuuguinnaq nassaarpugut. Aallaqqaammut assigiinngiiaalaarput, erininarsinngitsorli suffisussanik ammassappassuaqalerluni. Allatut oqaatigalugu 180 sømilinik atitussusilik ingerlaarfigisarput ammassappassuaqarpoq.

-Tamanna uannut tupaallannartorujussuunngilaq, ullumikkut ammassaqassuseq 2019-imi ukiakkut misissuinermut, aamma peqataaffigisatsinnut, naapertuulluinnarmat. Ukiuunerani ammassannialernissaq eqqarsaatigalugu isumalluareerpunga, kisiannili maanna isumalluarnissamut pissutissaqarnerulerlunga. Naatsumik oqaatigalugu ajunngilluinnartutut isikkoqarpoq, Polar Amaqqup naalagaa, Geir Zoëga, oqarpoq.

Siornatigut misilereersimagaa

Taanna oqaluttuarpoq, misissuinermi Islandimi immamik misissuisoqarfik qanimut isumasioqatigalugu ingerlanneqartoq, kisianni inuttat misissuinernik taama ittunik ukiorpassuarnik misilittagaqarnerat pissutigalugu, misissuisoqarfimmit sinniisumik ilaasoqarsimanngillat.

- Misissugassanik tigooraavugut tamakkuninngalu nalilersueqqissaarluta. Immamik misissuisoqarfimmut misissugassatut tigusanik aamma qerititerivugut, taakkualu angalanitsinnit paasissutissanik tamanik aamma tigusaqassallutik. Aap, tunngaviatigut suut tamarmik ukiuunerani nalinginnaasumik misissuinertut ingerlanneqarput, kilisaatip naalagaa oqaluttuarpoq.

Polar Amaroq ammassaqassutsimik imaani misissuinernik sivisuumik oqaluttuassartaqarpoq. Angallat inuussutissarsiutigalugu aalisariutini misissuinermi umiarsuartut peqataasutut siullerpaanut ilaasimavoq, immamillu misissuisoqarfik suleqatigalugu misissuiartorluni angalanerpassuarnik ingerlataqarsimalluni.

Kilisaat Tasiilami angerlarsimaffeqarpoq, inuttat amerlanersaasa aamma aggerfigisaanni.

Powered by Labrador CMS