Polar Aassik kivivoq
Polar Seafoodip kilisaataa Polar Aassik Qasigiannguit qimakkiartorlugit tissukartilluni kivivoq. Kalaallit Nunaata politiivi taama ilisimatitsipput. Kilisaatip kiviffiata nalaa oqartussanit suli nakkutigineqassaaq.
Polar Aassik, ullut unnuillu marluk ikuallareerluni Qasigiannguit qimakkiartorlugit tissukartilluni pingasunngornermi unnukkut kivivoq.
Kalaallit Nunaata Politiivi taama ilisimatitsipput.
- Piffissap sivikitsuinnaap iluani angallat immakkiartupallappoq, kivillunilu, politiit tusagassiorfinnut nalunaaruteqarlutik allapput.
Kilisaatip ikuallanneranik politiit ataasinngornermi unnukkut nalunaaqutaq 19.03 kalerrinneqarput. Inuttat quliusut tamarmik ajoratik annanneqarput.
Kilisaammi ikuallattoq piffissap ilaani pujuliuinnartaraluarluni aqutassaanngitsumik ikummaleriasaartarsimavoq.
Kilisaat Qasigiannguit eqqaani ullup ilarujussua ikkarleqqasimavoq. Kalaallit Nunaata Politiivisa upalungaarsimanermut nalunaarutaanni kingullermi ilisimatitsissutigineqarpoq Polar Aassiup kaanngarnermini Qasigiannguit qimallugit tissukalersimasoq.
Sumiiffik nakkutigineqassaaq
Polar Aassik pujuliorlunilu ikummalertortarmat Qasigiannguani innuttaasut politiinit ingalassimaqquneqarsimapput.
Arktisk Kommandop angallataa Knud Rasmussen upalungaarsimasuni sulinermi ikiuutissalluni Qasigiannguit tungaanukarpoq, aqagulu ullaakkut tikittussatut naatsorsuutigineqarluni.
- Sumiiffik qatserisartunit maanna nakkutigineqarpoq, puttaqutillu assersuutit avalatsinneqassanersut aqagu ullaakkut nalilersorneqassalluni. Puttaqutit assersuutit atorlugit angallammit orsussaq siammatsaaliorneqarsinnaavoq, avatangiisit imarlu akornuseqqunagit.
Politiit Qasigiannguani innuttaasut upalungaarsimanermut nalunaarutiminni kingullermi qutsavigaat ingalassimanissamut innersuussutinik malinninnerannut.