PN: Nipisattassiissutit pillugit suliaq kinguarsarneqassanngilaq

Partii Naleqqami siulittaasup tusagassiorfinnut nalunaaruteqarnermi, naalakkersuisooqatigiit nipisattassiisutit pillugit suliami atortut kalaallisut danskisullu allassimanissaannut tunngatillugu suleriaasiat sakkortuumik isornartorsiorpaa.

- Partii Naleqqamiit takusinnaavarput naalakkersuisooqatigiit oqaatsit pillugit marloqiusamik pissusilersornerat. Siullermik Kukkunersiuinermut Ataatsimiititaliap nipisaat suaat pillugit suliap suliarineqarnerani Naalakkersuisut siulittaasuata Kim Kielsenip advokatiata illersuisutut oqaaseqaataa qallunaatuinnaasoq suliarineqarpoq, Hans Enoksen allappoq, nangillunilu:

- Maannakkullu Kukkunersiuinermut Ataatsimiititaliaq aamma naalakkersuisooqatigiit
sulisinnaajunnaarpassipput, suliakkiissuteqarnermi attaveqaqatigiittarsimanerit tunngaviusut qallunaatuumiit nutsereerneqarsimatinnagit.

Kukknersiuinermut Ataatsimiititaliami siulittaasup Erik Jensenip (S) isornartorsiuineq akerlilerpaa.

- Ilaasortat tallimaasut tamarmik partiinit assigiinngitsunit tallimaneersut suliami matumani suleriaaseq akuerisimavaat, tamannalu tunngavigalugu sulivugut, Erik Jensen oqarpoq.

Taassuma ilisimatitsissutigaa, ataatsimiititaliamit allagaatit kingulliit nutseqquneqarsimasut, nutserneqarnerilu naammassineqariarpata suliaq suliaralugu ingerlateqqinniaraat.

Suliamik kinguarsaasut

Enoksen naapertorlugu suliaq pisariaqanngitsumik kinguarsarneqarpoq.

- Illersuisutut oqaaseqaataasoq nutserneqarsimanngikkaluartoq Kukkunersiuinermut
Ataatsimiititaliap nalunaarusiani suliarisinnaaguniuk, taava nipisaat suaat pillugit suliamut
piumasaarsorneq unitsillugu suliaq naammassillugu suliarisariaqalerpaa..

Erik Jensenilli isornartorsiuineq paasisinnaannginnerarpaa, tassa partii naminneerluni ataatsimiititaliami issiatitaqarmat.

- Hans Enoksen partiimeersuuvoq politikkikkut isummertartumi. Ataatsimiititaliami parteeqataa suleriaatsimut akuerseqataasimavoq. Kukkunersiuinermut Ataatsimiititaliaq partiip qalipaataa tunngavigalugu sulisanngilaq, suliat ataasiakkaat pituttorsimanngitsumik aamma arlaannaannulluunniit attuumassuteqanngitsumik suliarineqartarput, taanna oqarpoq.

Siulittaasoqarfik akuleruttariaqartoq

Hans Enoksen isumaqarpoq, Inatsisartut Siulittaasoqarfia suliap naammassineqarnissaa anguniarlugu nukingisaarisariaqartoq.

- Inatsisartut Siulittaasoqarfiat akuliuttariaqalerpoq, suliallu kalaallisuumut nutserneqarnerata piaartumik naammassineqarnissaa piumasarineqartariaqalerpoq. Tassaami nalunaarusiaq qaammatini sisamani isertuullugu paarineqarsimavoq, naalakkersuisunilu suliarineqaraluarmalluunniit nutserneqarsimanani.

- Isertuussineq tamaannga killeqartariaqalerpoq, taanna naggasiivoq.