PN: Mittarfiliassanut tunngatillugu Inatsisartut inatsimmik unioqqutitsisiinnaasut

Kangerlussuaq ammatiinnarneqassappat tamakkiisumik mittarfiliornissanut pilersaarutitigut inuiaqatigiit aningaasaqarniarnerannut amigartoortitsinissamik kinguneqarsinnaavoq. Tamannalu inatsimmik unioqqutitsinerussaaq, Pele Broberg isumaqarpoq.

Namminersorlutik Oqartussat attavilersuutinik suliaqarnissamut aningaasanik taarsigassarsissappata ungasinnerusumut aningaasaqarnikkut politikkeqarnermut iluanaarutaasussaaqqaassaaq. Tamanna missingersuutit pillugit inatsimmiippoq.

Mittarfiliassanullu tunngatillugu tamanna qulakkeerneqarsinnaanngilaq, Pele Broberg (PN) oqarpoq.

- Kalaallit Airports aningaasaqarnermut inatsimmut ilaavoq taamaattumillu inuiaqatigiit aningaasaqarniarnerannut iluanaarutaasussaanera pillugu missingersuutinut inatsimmi peqqussutip eqquutinnissaanut pisussaaffeqartoqarluni, Sermitsiaq.AG-mut oqarpoq.

- Uppernarsineqarsinnaanngilluinnarporli.

Pele Brobergip inuiaqatigiit aningaasaqarniarnerannut iluanaarummut tunngatillugu apeqqusiinerata tunngavigaa Kangerlussuup siunissaa suli tamakkiisumik paasinarsarneqarsimannginnera Naalakkersuisulli tamanna pillugu nalunaarnikuusimapput mittarfik atatiinnarneqassasoq.

Mittarfiliornissanut naatsorsuinermi siullermi takutinneqarpoq Kangerlussuaq heliportinngortinneqassappat inuiaqatigiit aningaasaqarniarnerannut kisiat iluanaarutaassasoq. Danskit aningaasaleeqataanissaasa akuerineqarnerata kingorna naatsorsuinerit aamma takutippaat mittarfiup 1.500 meterinik takussusillip atatiinnarneqarnera inuiaqatigiit aningaasaqarniarnerannut annikitsumik iluanaarutaassasoq.

- Naalakkersuisulli mittarfiup takissusaa tamaat atiinnarneqarnissaanik nalunaarnikuupput. Kangerlussuarmi mittarfik nutarterneqassappat taava inuiaqatigiinnut aningaasaqarniarnermut iluanaarut ukiuni 25-ni tulliuttuni milliardit affaanik amigartoorutinngussaaq, Pele Broberg (PN) oqarpoq.

- Taamaalilluni Nuummi Ilulissanilu mittarfittaassat ingerlatiinnarneqarpata ilutigalugulu Kangerlussuarmi mittarfiup takissusaa tamaat atatiinnarlugu ammatiinnarneqassaguni missingersuutinut inatsimmik unioqqutitsinerussaaq.

Mittarfiliornissanut pilersaarutinut paasissutissat amerlasuut aningaasaqarnermut akileraartarnermullu ataatsimiititaliap taamaallaat ilisimasimavaat taamaattumillu matoqqasumik suliaasimallutik.

- Maanna aningaasaqarnermut ataatsimiititaliap akisussaaffigilerpaa suliassarilerlugulu pilersaarutit aningaasaqarnermi ataqatigiikkunnaarnerat pillugu Inatsisartut ilisimatinnissaat. Inatsisartunut pilersaarummut aalajangiinissamut piumasaqaateqarnissaq qaangiutereerpoq.

Tamanna pillugu Pele Broberg isumaqarpoq Kalaallit Airportsip Munck Gruppenillu Nuummi Ilulissanilu mittarfiliornissanut marlunngorpat atsioqatigiinnginneranni aningaasaqarnermut akileraartarnermullu ataatsimiititaliaq unitsitsissasoq.

- Aningaasaqarnermut ataatsimiititaliami ilaasortanut erseqqissumik oqaatiginikuuara taassuminnga inatsiseqartoq maleruarneqassasorlu.

Ataatsimiititaliami ilaasortat aallaavittut ataatsimiinnertik pillugu paasissutissanik eqqartuisinnaanngillat. Kisianni namminneq qanoq oqarsimanerlutik oqaatigisinnaavaat.

- Naluara inatsit uanniit allaanertut allaniit nassuiarneqarnersoq. Isumaqarpungali tamanna ingerlatiinnarneqassappat akisussaaffiliisoqartoqassanersoq misissorneqartariqartoq.

Powered by Labrador CMS