PN qeqqussanik katersisalerniarpoq
Jens Napaattooq immap naasuinik atuilluarnermik siuarsaaniarpoq. Maki Seaweedip matusariaqarsimanera taassuma uggoraa.
Qeqqussanik nioqquteqarnermik aallarnisaasup Ulrik Maki Lyberthip suliffeqarfik nunatsinni qeqqussanik nioqquteqartutuaq Maki Seaweed siorna januaarimi matuaa. Pisortat oqartussat aporfigalugit taanna misigisimavoq.
- Kommuninut, Namminersorlutik Oqartussanut, Nunaqarfinni siulersuisunut allarpassuarnullu oqalugiartarnikkut qaammarsaajuaraluarlunga aamma siuarsaaniarlunga pisortaqarfinnut saaffiginnikkaluarlunga suna tamarmi uannut uteqqittarami, taanna taamani Sermitsiaq.AG-mut taama oqarpoq.
Sinaakkutit pitsaanngitsut
Tamannalu naammaginanngilaq, naalakkersuinikkut oqaaseqartartoq Jens Napaattooq (PN) taama isumaqarpoq.
- Pilersitsisut sinaakkutissanik, aporfinnik aammalu akerlerineqarlutik akuersaarneqarsinnaanngitsumik naammattuuinermi kingornatigut. Tamanna avatangiisitsinniit pissuteqanngilaq atorfilittalli aalajangersimasunik sinaakkutinik pissuteqartumik. Tassalu uagut innuttaasut sinnerlugit issiasuniit, taanna Inatsisartuni apeqquteqaat tunngavigalugu oqallissaarinermut tunngavilersuummini taama allappoq.
- Immap naasui avammut niuerutigissallugit atorluarneqanngitsut ilagaat. Nalunaarusiaq aallaavigalugu FAO, FN-ip immap naasuinik niueruteqarnermi ineriartortitsivianiit 2016-imi oqaatigineqarpoq nunarsuaq tamakkerlugu 6. mia U.S. dollars-inik naleqartut imatut oqaatigalugu 43 mia. koruuniullutik naleqartut maannakkut aammalu ilimagineqarluni immap naasui piumaneqarnerisa qaffakkiartuinnarnissaat ukiumut procentinngorlugu 10-iulluni .
Tapiinermut aaqqiissuterpassuit
Qeqqussat nunatsinnut iluanaarutaalerlutik ineriartortinneqarsinnaanerat, Naalakkersuisut isumaqatigaat.
- Atlantikup avannaani Kalaallit Nunaat minguinnerpaamik imartaqarpoq, immap naasuinik nerineqarsinnaasunik naatitsisarnissamut katersisarnermullu periarfissaqarluarluni, inuussutissarsiornermut naalakkersuisoq, Jess Svane (S) akissuteqaammini taama allappoq.
Maki Seaweedimi pisoq pillugu isornartorsiornermut toqqaannartumik oqaaseqanngilaq, kisianni assigiinngitsunik tapiissutinut aaqqiissuteqartoq innersuussivoq – pingaartumik qeqqussanik tunisassiornermi Greenland Business atorneqarsinnaasoq. Naalagaaffiup Greenland Venturemut aamma Vækstfondenimut 220 millionit koruuninik isumaqatigiissuteqarfigineqarnera Jess Svanep isaanit suliffeqarfiit nutaat tapiiffigineqarnissaannut periarfissiissapput.
Pilersaarut malillugu Inatsisartut suliaq ullup ingerlanerani oqaluuserissavaat.