PN-ip, NQ-p aamma IA-p ministeriuneq tunniussaqarnerusinnaasoq tikkuarumavaat

Socialdemokraatineersoq Mette Frederiksen imaluunniit Venstremeersoq Lars Løkke Rasmussen ministeriunertut siumugaaq taaniarnagu Partii Naleraq nalunaartunut ilannguppoq.

- Partii Naleqqamiit ulluinnarni atukkatigut Kalaallit Nunaanni najugaqartuusunut oqinnerulersitsinissaq qineqqusaarutiginiarparput, qineqqusaarnerlu danskit partiiviniit aningaasatigut akilerneqarnata tamanna ingerlassavarput. Qinersisartut taasineri kisinneqaraarpata, maani Danmarkimilu, taava oqaloqatigiinnissamut utaqqimaassavarput. Qilersorsimannginnissaq anguniarlugu, partii tusagassiutinut nalunaaruteqarluni allappoq.

Oqaluuseriumasat assigiinngillat

Kalaallit ilaasortaatitassaat isumaqatiginninniarnerni pingaaruteqarluinnartutut inississappata, tamanna Aleqa Hammondip (NQ) sunniuteqarnerunissaq anguniarlugu atorluarniarpaa, taamaammat partiimut suleqatigisartakkaminut siumoortumik pituttornianngilaq.

- Danmarkip Kalaallit Nunaatalu atanerat allanngornikuuvoq. Taamaammat kalaallit partiiat danskillu partiiat suleqatigisagaq imaanngilaq assigiimmik soqutigisaqartut, Sermitsiaq.AG-mut oqarpoq.

- Nunatut eqqarsassuugut Kalaallit Nunaatalu sunniuteqarnerunissaa anguniassallugu. Tamanna isumaqarpoq siumoortumik ministeriunissatut tapersersugassatsinnik tikkuaariissanngitsugut.

Isumaqatigiissutigineqartuni peqataarusuttoq

Aaja Chemnitz Larsen (IA) ilaasortatut pingaaruteqartutut inississagaluaruni, Mette Frederiksen aamma Lars Løkke Rasmussen kimigiiserfiginissaanut piareersimavoq.

- Isumaqatiginninniarnerni inissisimalluarutta tamanna Kalaallit Nunaata sunniuteqarnerunissaanut atorluassavarput, Sermitsiaq.AG-mut oqarpoq.

Folketingimi qinigaaffimmi matumani kalaallit folketingimi ilaasortaatitaat siullermeerlutik aningaasanut inatsisissaq pillugu isumaqatiginninniarnernut peqataasimapput, taamatullu inatsisinik atuutsitsinermut illersornissamullu tunngasunik apeqqutini tusarniarfigineqarsimallutik. Ineriartorneq tamanna Aaja Chemnitz Larsenimiit Aleqa Hammondimiillu oqaluttuarisaanermi pingaaruteqarluinnartutut isigineqarpoq. Isumaqatigiissusiornermili peqataatinneqanngillat, tamannalu alloriarneq tulliusariaqartoq IA-p folketingimut ilaasortaatitaa isumaqarpoq.

- Isumaqatiginninniarnerni toqqaannartumik peqataatinneqassaagut, Folketingimi ilaasortatut sillimmataannaanata, oqarpoq.

Ministeriunerulerumaartussap ataatsimeeqatigikulanerulernissaa aamma sulissutigiumavaa, taamaasiornikkut Kalaallit Nunaat Issittorlu Avannarleq pillugit apeqqutini kalaallit peqataatinneqartuarnissaat anguniarlugu. Aaja Chemnitz Larsen oqaluttuarpoq danskit naalakkersuisugilerumaagassaannut piumasaqaatissani naammassilereerlugit.

NQ-miit piumasaqaatit pingasut

Naalakkersuisuutitaqartussanut isumaqatiginninniarnissani pingaarnertut pingasunik piumasaqaateqarluni, Aleqa Hammond ilisimatitsivoq.

1. Kalaallit Nunaat nunanut allanut tunngasunut politikkimi amerlanerusunik piginnaatinneqassaaq.

2. Issittoq Avannarleq pineqartillugu oqalliffiusuni Kalaallit Nunaat issiaqataalluni peqataatinneqartassaaq.

3. Kalaallit Nunaat, Danmark USA-lu illersornissami immikkut isumaqatigiissuteqassapput, amerikamiut sumiiffimmiinnerat Kalaallit Nunaannut iluaqutaanerunissaanik qulakkeerisumik.

- Qinigaassaguma naatsorsuutigaara isumaqatiginninniarnissanut qaaqqusaanissara, Lars Løkke Rasmussen imaluunniit Mette Frederiksen isumaqatiginninniartuunersoq apeqqutaatinnagu.

Qanorluunniit inerneqaraluarpat peqataatitsinerunissaq

Aaja Chemnitz Larsenip erseqqissarpaa isumaqatiginninniarnermi pingaaruteqartutut inissinngikkaluaraanniluunniit, aamma sunniuteqartoqartartoq. Maanna naalakkersuisuutitaqartut Kalaallit Nunaat pillugu suliaqarneranni isumaqatiginninniarnernut qaaqqusaasimavoq.

- Mette Frederiksen Lars Løkke Rasmusseniluunniit arlaat ministeriunerulerpat naatsorsuutigaara qinigaaffimmi tullermi suli annertunerusumik sunniuteqaqataanissarput.