Skip to main content

PN-ip kiffartuussinissamut isumaqatigiissutit ammasumik ingerlanneqarnissaat amigaatigai

Kiffartuussinissamut isumaqatigiissutit maanna atuuttut atorunnaangajalerput suliaqarnerlu tamaviaarunneqarluni. Partii Naleqqamit isumaqatigiissutit nutaat ammasumik oqaloqatigiissutigineqarnissat ujartorneqarpoq.

Patii Naleqqamit isumaqartoqarpoq, kiffartuussinissamut isumaqatigiissutit nutaat akuerineqartinnagit atsiorneqartinnagillu Inatsisartuni ilaasortanut tamanut innuttaasunullu Naalakkersuisut saqqummiuttariaqaraaat.

- Neriuutigisimagaluarparput ammanerusumik ingerlatsisoqassasoq, pisimasullu ilinniarfigalugit erseqqissumik oqaatigisariaqarparput suliaq ajortumik ingerlanneqarsimasoq, Pele Broberg Sermitsiaq.AG-mut oqarpoq.

Partii Nalerarlu kisimiinngilaq Naalakkersuisut kiffartuussinissamut isumaqatigiissutinut tunngatillugit matoqqasumik ingerlatsinerannut piffissaagallartillugulu suliaqarsimannginnerannut isornartorsiuisoq.

Arlallit tupigusuttut

Takornariartitsisartup ataatsip qanittukkut oqaatigaa, Naalakkersuisut namminneq takornariartitsisarnermut periusissiaanni allassimasoq piffissaagallartillugu isumaqatigiissuteqartoqartassasoq.

Takornariartitsinermik ingerlataqartartoq alla isumaqarpoq, isumaqatigiissutissat suliariumannittussarsiuunneqaratik Diskolinemut toqqaannartumik tunniuteqqinneqartut.

Partii Naleqqamit tamanna aamma maluginiarneqarsimavoq.

- Naalakkersuisut januaarip qaammataani nalunaarutigaat, angallassisartutut isumaqatigiissuteqarfigisimasartik atoqqikkusullugu aamma ukiuni qulini atuuttussamik isumaqatigiissuteqarfigerusullugu, Pele Broberg oqarpoq.

Tupigusuutiginerarpaa ataatsimiititaliami ataatsimi ilaasortat sisamaannaat piffissamut taamak sivisutigisumut isumaqatigiissutissamik akuersissuteqarsinnaasimanerat.

- Isumaqatigiissutit allanut tusarliuteqqusaanngitsut Inatsisartuni ilaasortanit sisamaannarnit naqissuserneqarsimallutillu akuersissutigineqarsimanerat inissaminiinngilaq. Kukkussutivut ilinniarfigitigit.

Taamatoqqinnaaq pisoqaqqittoq

Pele Brobergip oqaatigaa, 2016-imi kiffartuussinissamut isumaqatigiissutigineqartut isornartorsiorneqarsimaqimmata, taamatut pisoqaqqinnginnissaa anguniarlugu maanna isumaqatiginninniarnermi ammanerusumik ingerlatsisoqartariaqaraluartoq.

2016-imi kammalaatersortoqarneranik aamma kiffartuussinissamut isumaqatigiissutinut tunngatillugit suliariumannittussarsiuussinissamut malittarisassat aaqqiiffigineqarsimannginneri pillugit pasilliutit arlaqarsimapput, taamanikkullu borgmesterit isumaqatigiissutigineqartunut akerliusimallutik.

Naalakkersuisulli maanna isumaqatiginninniarnermut tunngatillugit oqaaseqarpallaarsimanngillat. Sermitsiaq:AG-mit Ineqarnermut Attaveqaatinullu Naalakkersuisoq Karl Frederik Danielsen arlaleriarluni oqaaseqartinniarneqartaraluarpoq, iluatsinngittumilli. 

Saqqummiunneqartut annikitsuinnaasimasut

Ineqarnermut Attaveqaatinullu Naalakkersuisoqarfimmit oktobarip 22-ani tusagassiorfinnut nalunaarutigineqarpoq, Naalakkersuisut piffissami sivisuumi isumaqatiginninniareerlutik, kiffartuussinissamut isumaqatigiissutissamut missingiut akuerisimagaat.

Upernaaq isumaqatiginninniarnerit allartinnginneranni, isumaqatigiissummi atuuttumi atuisut misilittagaat isumaqatigiissutissamut nutaamut ilanngunneqarnissaat aamma nunami tamarmi ilaasunik assartuisarnermut atatillugu siunissami angorusutat qulakkeerniarlugit soqutigisaqaqatigiit tamarmik peqataatinneqarsimasut, taamanikkut nalunaarutigineqarpoq.

Naalakkersuisulli soqutigisaqaqatigiinnik tamanik peqataatitsisimallutik oqarnertik namminneq akisussaaffigissavaat, pingaartumik isumaqatigiissut atsiorneqartinnagu innuttaasunut saqqummiunneqarsimanngimmat, Partii Naleqqamit oqaatigineqarpoq.

- Partii Naleqqamit erseqqissumik oqaatigisinnaavarput, pitsanngorsaataasinnaasutut siunnersuutivut kiffartuussinissamut isumaqatigiissutissatut saqqummiunneqartumut ilanngunneqarsimanngittut. Sanaartornermut Ataatsimiititaliami isumasioqatigiinnermiluunniit siunnersuutigisavut ilanngunneqarsimanngillat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER