Skip to main content

Plastic not so fantastic: 'Eqqagassakinnerulertoqarsinnaavoq plastikkimillu atuinikinnerulertoqarsinnaalluni'

Tuperna Mathiesen nanginik igaffimmilu allarutissianik atoqqittakkanik ukiuni sisamani kingullerni atuereerpoq.

Imermik kuisoortoqarpat igaffimmi allarutissiamik allarterneqassaaq, allarutissiarlu atoreerpat iginneqarluni. Meeraaqqap nangia taarserneqarpat, meeraaqqap nangia atoreersimasoq saligutillu atorsimasut iginneqassapput. Pujoralaajaanermi allarutissat ataasiartakkat atorneqassapput, aammalu taakku atoreerpata iginneqassallutik.

Ulluinnaat taamaattut ilaqutariit arlallit ilisarisinnaassajunnarsivaat. Tuperna Mathiesenili taama inuunngilaq. Allarutissiat annoraamerngit atugarai, erroriarlugillu atoqqittarlugit. Taamaasilluni ulluinnarni atuinini eqqaaninilu annikillisinnaasimavai.

- Pisiniaraangatta nerisassaanerusut pisiarisarpagut. Uagutsinni atortakkagut allat atoqqittarpagut, Tuperna Mathiesen Sermitsiaq.AG-mut oqaluttuarpoq.

Atoqqiisarneq pillugu soqutiginnittuaannarnikuunngilaq. Naartuleramili, ukiuuneranilu ernisussaalluni, nanginut igittakkanut suut taarsiussinnaanerlugit misissuilersimavoq, nangiutaarutilerunimi naalungiarnermi nalaani anorersuartillugu issinneranilu pisiniariaannaanavianngilaq.

- Paasivara nangit igittakkat akuutissalersorneqarsimasut, milluaalluarnerusinnaaniassammata. Nangit annoraamerngit, pisariaqanngitsunik akuutissalersugaanngitsut atorusunneruakka, oqarpoq.

Akuutissakinnerit

Tassanili uninngilaq. Tuperna siullermik trafikassistentitut, kingornalu ilinniartitsisunngorniarluni ilinniartussanngorami, ulluinnarni sipaarnerulerniarluni aalajangerpoq.

Igaffimmi allarutissiat igittakkat annoraaminernik errorsinnaasunik taarserneqarput. Nalequttat menstruationscuppimik nalequttanillu annoraaminernik errortakkanik taarserneqarlutik. Puussiat plastikkit niuernermi pisiarineqartartut annoraaminernik pisiniarfiliutinik taarserneqarput. Taqussanullu poorineqartartut foliet puussiaaqqallu plastikkiusut annoraaminernik puussanik taarserneqarlutik.

- Sipaarnartorujussuuvoq, ajornanngitsunnguullunilu. Anartarfimmiluunniit eqqaaveqanngilagut. Igitassakinnerusarpugut, angerlarsimaffippullu igitassarsunnilerneq ajorpoq, Tuperna Mathiesen illarluni oqarpoq.

Facebookimi eqimattami ’Plastic not so fantastic’-imi ulluinnarni atuinerup annikillisinnissaanut arlalinnik siunnersuuteqartoqarpoq. Siunnersuutit taakku Tuperna Mathiesenip atugarai namminerlu aamma siunnersuuteqartarluni.

LÆS OGSÅ: Plastic not so fantastic: Suliniuteqartut plastikkimik annikinnerusumik atuisitsiniaasut

Tuperna Mathiesenip erseqqissarpaa sipaarniarluni akuutissanillu atuinikinneruniarluni atoqqiisarluni. Avatangiisinut iluaqutaanera sammisarisorsuunngilaa, aammali saniatigut iluaqutaaginnarluni.

Tuperna Mathiesen nassuiaavoq nangit ataatsit 175 koruuninik akeqartut qaammammut marloriarluni pisiarisaraanni, taarsernerani ukiumut 4.200 koruuninik sipaartoqarsinnasoq.

Sungiussiniaaneq

Annoraaminernilli errorneqartartussanut atoqqinneqartartussanillu atuilerneq aallaqqaammut unammillernartoqartarpoq.

Tuperna Mathiesen nanginik errortakkanik atuileqqaarami, meeraaraq anarsimatillugu saliisariaqartarnini piffissap ilaani sungiunniaqqaarsimavaa, angajoqqaanngortummi allat nanginik taarsersuitillutik nangit atoriikkat igiinnartaraat, Tuperna Mathiesen saliisariaqartarsimavoq. Tuperna Mathiesen Sermitsiaq.AG-mut oqaluttuarpoq nangit ipeqarpata igiinnassanerlugit eqqarsaatigisarsimallugu. Nangilli erroriarlugit atoqqissinnaammata, tamanna imminut akilersinnaasimanngilaq.

- Nangit ipeqartut salinnissaat siullermik killissamik qaangiinarpoq, sungiukkaannili ajornanngitsunnguupput. Nangillu salinnissai maajunnanngillat, errorunik ipeerutivittussaagamik, Tuperna Mathiesen oqaluttuarpoq.

Sermiligaami meeqqat pisinnaatitaaffii pillugit malunnartitsinermi atuarfik nunaqarfimmiunit ornigarneqarluarpoq
Sermiligaami atuarfik novembarip ulluisa 19-ianni 20-annilu ornigarneqarluarpoq, meeqqat pisinnaatitaaffii pillugit malunnartitsinermut nunaqarfimmiut tamakkerlugit qaaqquneqarmata
Nunaqarfimmi arsaattarfik pitsaanerusoq
Ukiuni kingullerni Nuna tamakkerlugu arsaattarfiit ivigaaraasallit amerliartupiloorput, mannakkullu Kuummiini innuttaasut arsaattarfittaarnissaannut aningaasanik immikkoortitsisoqarpoq.
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

Seneste Ugeavis

SENESTE NUUK - NYHEDER