Skip to main content

PK: Atorfillit akissarsiaannut isumaqatigiinniarnerit sivitsorpallaarput

Peqqissaasut tjenestemanditut akissarsiaqartinneqartut akissarsiaannut tunngatillugu isumaqatigiinniarnerit sivitsorpallaarnerat, Peqqissaasut Kattuffiannit kipiluttunartinneqarpoq.

- Nunarsuarmi pitsaalluinnartumiikkaluarutta, isumaqatigiissut 2016-imili atsiortussatut naammassereersimassagaluarpoq, Ken Jensen, Peqqissaasut Kattuffianni, PK-mi siulittaasoq oqarpoq.

Taanna nassuiaavoq peqqissaasut tjenestemanditut atorfeqartinneqartut akissarsiaannut sulinermilu atugassarititaannut isumaqatiginninniarnermi Namminersorlutik Oqartussanit ilisimatinneqartarsimallutik ulapputeqarpallaarneq pissutigalugu, isumaqatigiinniarnerit kinguartinneqartariaqartut.

- Kialluunniit tamanna naammagiinnarsinnaanngilaa. Piffissaq taama sivisutigisoq atorlugu suli isumaqatigiissuteqarsinnaannginnerput ingasappallaaqaaq. Atsiornissatsinnut piareeraangatta, illuatungaaniit ilisimatinneqartarpugut immikkuualuttut misissoqqinneqartariaqartut, taava atsiornissaagaluaq kinguartinneqaqqittarpoq, oqarpoq.

Taassuma neriuutigaa naatsorsuutigilluinnarlugulu illuatungeriit isumaqatigiissummik aqagu ataasinngornermi atsiorinnaassasut.

Qaammatit marluk qaangiuppata isumaqatiginninniartoqaqqilissaaq

Siulittaasup erseqqissaassutigaa Kalaallit Nunaanni peqqinnissaqarfiup iluani atorfinitsitsipallassinnaanissaq anguniaraanni, taava akissarsiat sulinermulu atugassat ajunngitsumik suliarineqartariaqartut. Sulisussaaruttarneq ajornartorsiutaajunnaartinniaraanni, isumaqatigiissutit atuuttut piffissaliussap iluani naammassineqartariaqarput.

PK isumaqarpoq, sulisut annaannginnissaannut suliniuteqarnermi, isumaqatigiissutit piffissaliussap iluani naammassineqartarnissaat, pisariaqarluinnartoq. Tamanna PK-p isumaani, Peqqinnissaq pillugu ataatsimiititaliarsuarmi misissugassatut ilanngunneqartariaqarpoq.

Peqqissaasut tjenestemanditut atorfeqartinneqartut pillugit isumaqatigiissut 2017-imili atuutilertussaagaluartoq, suli atsiorneqanngilaq.

- Ingasappallaaqaaq, isumaqatigiissummut tullermut isumaqatiginninniaqqinnissatsinnut qaammatit marluinnanngorput. Neriuppunga illuatungigut uannga ilikkagaqarsimassasut, uagummi ilikkagaqarpugut, Ken Jensen oqarpoq.

Ken Jensen ilisimatitsivoq PK isumaqatiginninniarnissanut tullernut piumasaqaatiliorlutik naammassereersimasut, isumaqatiginninniarnerup massuma ingerlanneqarnerani malitsigisaanik tullissaanimut piareersartariaqarsimagamik.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER