Piviusulersaarutip kingorna kajumissaarut: Nunatsinni iliveqarfinni naapitta
Kinguaassiutitigut atornerlugaasimasunut ilaqutaasoq qinikkanut eqqissisimasumik malunnartitsinissamut kajumissaaruteqarpoq.
Heidi Møller Isaksenip kinguaassiutitigut atornerluinerit qanimut misigisaqarfiginikuuai – qanigisanut atornerluinerit ingasalluinnartut.
Piviusulersaarut 'Byen hvor børnene forsvinder' takugamiuk aalassattorujussuuvoq.
- Qinikkat iluaqutaangitsut qatsullugit iliuuseqartariaqarlunga misigivunga.
Ingasappallaaqaat qinikkat asuli ajornartorsiutigut kusssaraat pisariaqartullu iluamik tusaassanagit piviusut suunersut paasinngikkaat, Facebookimi qisuariarluni taama allappoq.
Taamaattumik nuna tamakkerlugu iliveqarfinni unnugu nalunaaqutaq 19.00 naapinnissamut kaammattuivoq.
- Sumiginnagaaneq imaluunniit atornerlugaaneq pissutigalugu imminut toqussimasumik tamatta nalunngisaqarnerput qularnanngilaq – ataqqinninnermi aamma akiuukkusunnermik takutitsigit.
- Ataatsimoornerput takutitsigu.
Heidi Møller Isaksen suliniummi Killiliisami maligassiuisuuvoq, tassani nammineq oqaluttuarnermigut kinguaassiutitigut atornerluinerit pillugit nipangiusimajunnaarsitsiniarnermut peqataavoq.