Piviusulersaarusiaq: Igasup tusaamasap Ilimanaliarnera

Savalimmiuni neriniartarfiup KOKS-ip iggavini matuaa Kalaallit Nunaaliarlunilu tikeraat nunarsuarmit tamaneersut mamarsaakkanik nerisassiornikkut asseqanngitsumik misigisaqartissinnaajumallugit. Unammilligassalli tulleriiaaginnavipput. Iggaveqanngippammi qanoq iliortoqassava?

Viaplay igasoq tusaamasaq Poul Andrias Ziska aamma neriniartarfik peqatigalugu Savalimmiunit Ilimanamut angalaneq pillugu piviusulersaarusiorsimavoq.

Neriniartarfik Michelinimit ulloriaasannatinneqarsimasoq KOKS tikeraat avataaneersut nerisassiassat nunatsinneersut pitsaalluinnartut atorlugit nerisassianik mamarsaakkanik alutorsartinniarlugit Ilimanami pilersinneqarmat illit aamma KOKS siorna aasakkut orninngitsoorpiuk? Taava maanna iserfiginissaanut periarfissaqalerputit.

Viaplay igasoq tusaamasaq Poul Andrias Ziska nerininartarfillu peqatigalugu Savalimmiunit Ilimanamut angalaneq pillugit piviusulersaarusiorsimavoq.

Igasoq suleqataalu neriniartarfik ammarneqaqqaartussanngormat suliassarpassuaqarsimapput aqqutaanilu unammilligassarpassuaqarsimallutik, tikeraanut siorna aasakkut qaammatini marlunni maani nunatsinni nunaqarfeeqqammi nerisassianik mamarsaakkanik pitsaalluinnartunik misigisaqarsinnaasimasunut saqqummiunneqarsimanngitsunik.

- Nunarsuarmi sumiiffimmi avinngarussimalluinnartumi inuppassuit tikeraassallugu takorluuinnartagaanni neriniartarfimmi ammaaneq oqaluttualiatut ilungersunarluinnartutut misigisassatullu ilikkagassarpassuaqarfiusutut misinnarsimavoq. Neriuppunga najukkami nerisaqarnikkut kulturimik paasiniaalluta nerisassioriaatsimullu allaanerulluinnartumut nutaaliaasumut ilanngutitinniarlugu qanoq suliaqarsimanerput piviusulersaarusiamit takutinneqassasoq, KOKS-imi igasut pisortaat, Poul Andrias Ziska, oqarpoq.

Periarfissaqanngikkuit

Kalaallit Nunaanni KOKS-ip inunnit arlaqanngitsuinnarnit tikinneqarnissaa aamma nassuerutigaa, isumaqarnerarlunili, piviusulersaarusiamit pisup qanimut misiginissaanut Viaplayimik isiginnaartartut periarfissinneqartut.

Piviusulersaarusiaq "The Most Remote Restaurant in the World" Viaplayimi sisamanngornermi juunip aallaqqaataani takuteqqaarneqarpoq.

- Piviusulersaarusiaq suliniut ajornarluinnartoq, inuiaqatigiinnut asseqanngilluinnartunut isissutaasoq, pillugu nuannersumik unneqqarissumillu oqaluttuaavoq, isiginnaartartunit nalinginnaasumik misigineqartanngitsoq,Viasat piviusulersaarusiaq pillugu allappoq.

Powered by Labrador CMS