Piviusulersaarummi saqqummertoq pillugu isumaginnittup nipangiussisussaanini unioqqutippaa

Tasiilami isumaginnittuusimasup Naasunnguaq Ignatiussen Streymoy pillugu paasissutissat oqaatigeqqusaanngitsut aamma eqqunngitsut Facebookimi saqqummiuppai.

Tasiilami isumaginninnermik suliaqarsimasup, Naasunnguaq Ignatiussen Streymoy piviusulersaarummi ’Byen hvor børn forsvinder’ peqataasoq pillugu paasissutissanik oqaatigeqqusaanngitsunik Facebookimi nittarsaassivoq. Paasissutissat kukkusut.

Isumaginnittoq pineqartoq Naasunnguaq Ignatiussen Streymoy panialu pillugit sulianut ilisimannittuuvoq, taamaalillunilu taakku pillugit oqaluttuarnermini nipangiussisussaatitaanini unioqqutippaa.

- Paasissutissat inuit attaveqaqatigiittarfiini saqqummiunneqarnerat kamaatigaara. Kommunimi ikiortissarsiorsimalluni tamanut ammasumik saqqummiunneqarneq akuersaagassaanngilaq, Naasunnguaq Ignatiussen Streymoy Sermitsiaq.AG-mut oqarpoq.

Facebookimi ilanngussamut atatillugu paasissutissat oqalliffiusumi saqqummiunneqarput. Piviusulersaarummi salluliortoqartoq isumaginnittuusimasoq allappoq, ilaqutariit ikiorneqarsimanerarlugit. Atuisup allap suminngaanniit nalunnginneraa aperivoq. Isumaginnittuusimasoq sulinermini ilisimasaqarfigalugu allappoq.

Oqalliffimmi paasissutissat oqaatigeqqusaanngitsut oqaatigineqarnerannit tigulaagaq Uddrag af den debattråd, hvor de fortrolige oplysninger bliver dely

Piviusulersaarutip immiunneqarnerani naammaginartumik ikiorserneqarsimannginnertik Naasunnguaq Ignatiussen Streymoyip Sermitsiaq.AG-mut attannerarpaa.

- Inuusuttunut siunnersortitut ilinniarsimasumik oqaloqateqarnissatsinnut neqeroorfigineqarpugu, tamannalu paninnut naammanngilluinnarpoq. Kinguaassiutitigut atornerlunneqarnermi kingorna imminut toqunnissamik navianartorsiorpoq, imminullu toqunniarsarisoq unitsittariaqarnikuuarput.

Ilinniartitsisoq paasissutissanik uppernarsaavoq

Ilinniartitsisup Rikke Blegvadip suliami Naasunnguaq aamma pania pillugit allagaatit ilisimavai. Allagaatit imarisai pillugit oqaaseqarnissaminut Naasunnguamit akuerineqarpoq. Ilaqutariit pisariaqartitaminnik naammaginartumik ikiorneqarsimanngitsut, Rikke Blegvad naliliivoq.

- Ilaqutariit naammaginanngilluinnartumik ikiorneqarnissamut neqeroorfigineqarsimasut uppernarsarsinnaavara. Piffissami tassani piviusulersaarutip immiunneqarnerani inuusuttunut siunnersortitut ilinniarsimasumik oqaloqateqarnissamik taamaallaat neqeroorfigineqarput. Naasunnguup paniata ilungersunartumik inissisimanera pineqartillugu, suliamut ilisimasalimmik ikiorneqarnissaq pisariaqarpoq.

Ilaqutariit arlaleriarlutik suliamut ilisimasalimmik panimminnut ikiortissarsiortarput, kisianni piffissami tassani akissut taannaajuaannarpoq.

- Paasitinneqartarpugut ilaqutariit ingerlalluartuusugut, allallu ikiorneqarnissaminnik pisariaqartitsinerusut. Atuarfik, politiit aamma napparsimmavik Naasunnguup paniata ikiorneqartariaqarneranik nalunaarutiginnittaraluartut tamanna pivoq.

Ikiorneqarnermut taarsiullugu nakorsaatit

Paniata imminut toqunnissaa aarlerinarsigaangat arlaleriarluni napparsimmavimmi uninngatinneqartarnikuuvoq.

- Taamaallaat eqqissisaatitortinneqartarpoq, naammaginartumik eqqissinissaata tungaanut. Tassani nalunaarutigineqartarpoq, kommuni tarnip pissusaanik ilisimasalimmik neqerooruteqartussaasoq.

Ukiaq kingulleq Naasunnguaq paninilu ikiortissamik sivisuumik ilungersuussaminnik kiisami pissarsipput. Pani maanna qaammammut akunneq ataaseq imaluunniit marluk psykoterapeertarpoq.

Rikke Blegvadip sulinerminut atatillugu meeqqat pillugit paasissutissat oqaatiginaveersaaqqinnaarlugit suliarineqartarnerisa pingaassusaat ilisimavaa. Isumaginnittup paasissutissat taamaattut saqqummiussinnaammagit mamiasuttorujussuuvoq.

- Tasiilami isumaginnittuusimasup Facebookikkut paasissutissanik oqaatigeqqusaanngitsunik saqqummiussinermigut nipangiussisusaatitaanerminik unioqqutitsinera tupigisorujussuuara. Pineqartumit, tassa Tasiilami meeqqanik sumiginnaanermit allamut saasaariniarnertut tamanna isigaara.

Naasunnguaq Ignatiussen Streymoyip taanna pineqartoq nipangiussisussaatitaanermik unioqqutitsisutut maanna politiinut nalunaarutiginiarpaa.

Pineqartup Facebookiani takuneqarsinnaavoq, taanna kommunimi allami isumaginninnermik suliaqartuusoq.

Powered by Labrador CMS