Skip to main content

Piumasaqartoqarnerata kingorna: Royal Greenland aqutsisoqatigiinni allannguiniarluni nalunaaruteqarpoq

Suliffeqarfissuaq Royal Greenland suliffeqarfimmi aqutsisoqatigiinni allannguilerpoq. Pisortat marluk Kalaallit Nunaanni najugaqassapput, suliffeqarfik nalunaaruteqarpoq.

Ingerlatseqatigiiffiup aqutsisui Kalaallit Nunaanni najugaqassasut, Naalakkersuisut ukiuni arlalinni Royal Greenlandimut oqaatiginnittarput.

Ukioq manna ileqquusumik ataatsimeersuartoqarnerani Naalakkersuisut siulittaasuata, Múte B. Egedep (IA), aqutsisut Kalaallit Nunaanni najugaqarnissaannut pilersaarummik ukioq manna septembarimi kingusinnerpaamik saqqummiunneqarnissaat oqallisaavoq.

Suliffeqarfissuarmit Namminersorlutik Oqartussanit pigineqartumit maanna suliami nutaarsiassaqalerpoq.

Piumasaqartoqarnerata kingorna nalunaaruteqartut

Suliffeqarfissuarmi aqutsisoqatigiinnik allannguisoqarnissaa, allannguinerlu Kalaallit Nunaanni aqutsisut amerlanerulernissaannik pilersitsissasoq, ingerlatseqatigiiffik tusagassiuutinut nalunaarummi allappoq (Paasisani suliffeqarfissuup aqutsisui nutaat takukkit).

Aaqqissuussaanermik nutaami suliffeqarfissuarmi aqutsisut amerlanerit Kalaallit Nunaata avataani suli najugaqassapput.

Atorfiit nutaat pillugit Naalakkersuisut piumasaqaateqarnerannut tunngasut, pisortaaneq Susanne Arfelt Rajamand, Sermitsiaq.AG-mut oqarpoq.

Apeqqut: Isumaqarpit allannguinermi piumasaqaatinik naammassinnittusi?

- Alloriarneruvoq, piginnaasalinnillu ineriartortitsineq qiviaraanni allannguineq sivisoorujussuarmik pisarpoq. Suliffeqarfiup pisariaqartitaanik tunniussinissamut alloriarneq taanna siulliusoraara. Suliffeqarfik nunani tamalaani suliffeqarfissuuvoq, Royal Greenland taamaattumik nunani tamalaani niuerfiit attaveqarfigisariaqarpai, tamatumalu peqatigisaanik Kalaallit Nunaanni inissisimalluarluni, Susanne Arfelt Rajamand oqarpoq.

Atorfiit nutaamik agguataarneqarnerat suliffeqarfimmut pitsaasuusoq, pisortaanerup oqaatigaa, tassani assersuutigalugu ”Nittarsaassinermut aamma piujuartitsinermut” pisortatut aatorfimmik pilersitsisoqarpoq, taanna siornatigut suliffeqarfissuarmi tuniniaasup ataaniissimagaluarpoq.

- Tuniniaanermi aamma pisisartutsinnut attaveqarnerput nukittorsarusupparput, taakkuupput nioqqutitsinnik atuisut. Piujuartitsinermik ukkataqarnerulernermi pisisartut pissusilersornerannik immikkuualuttulerinermi, immikkut piginnaasalinnik peqarnissaq pingaartuusoq nalilerparput, taamaalilluta paasinninnermut annertusillugulu unammillersinnaanerussagatta.

Ukiaanerani inuttalerneqarnissaa naatsorsuutigineqartoq

Sulisoqarnermut attaveqatigiinnermullu pisortatut, nittarsaassinermut piujuartitsinermut pisortamik aamma tuniniaanermut pisortatut atorfiit 2023-imi ukiaanerani inuttalerneqarnissaat naatsorsuutigineqarpoq.

Siulersuisuni siulittaasup Maliina Abelsenip allannguutit pitsaasuunerarpai:

- Royal Greenland suliffeqarfiuvoq nunatsinnut tamarmut pingaaruteqarluinnartoq. Suliffeqarfik nunani tamalaani immikkoortortalik tamatta tulluusimaarutigisinnaasarput. Pisortaanertut atorfinittoq kingulleq Susanne Arfelt Rajamand nunani tamalaani atorfeqarnermik misilittagaqarpoq. Susanne aqutsisooqatigiinnik nukittuunik, Royal Greenlandip nunatsinni aammali nunani tamalaani aallussineranik ataatsimoorussamik patajaallisaasinnaasumik, pilersitsisinnaanera upperaarput, siulersuisuni siulittaasoq oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER