Piumasaqarneq: Qeqertarsuup Tunuani angallanneq pitsaanerulertariaqarpoq

Qeqertarsuup Tunuani ukiuni 20-ni kingullerni angallannikkut pitsanngoriartoqarsimanngilaq, maannalu ineriartuutaasinnaasumik aaqqiisoqarnissaa piffissanngortoq, Aqqa Samuelsen isumaqarpoq.

- Qeqertarsuup Tunuani angallassineq eqqarsaatigissagaanni maajimiit silaannakkut angallanneq unitsinneqartarpoq, kiisalu sinersortaat Sarfaq Ittuk Kangaatsiamut Qasigiannguanullu tikisinneqartarunnaavinnikuulluni. Qeqertarsuaq ukiakkut taamaallaat tikinneqartalerpoq. Ukiut 20-it siuliinut sanilliutissagaanni ullumikkut Qeqertarsuup Tunuani angallannikkut pissutsit pitsaanngoriartorsimanngillat, maannakkullu ineriartuutaasussamut alloriaqqittoqartariaqalerluni. Aasakkut silaannakkut angallannerup atorunnaarsinneqarnikuunerata kingunerisaanik ungasinnerusumut, soorlu Ilulissaniit avannamut kiisalu Aasianniit kujammut angallannerup ataqatigiinnerusumik aaqqissuunneqarnissaa pisariaqarluinnarpoq, IA tunuliaqutaralugu politikeriusoq tusagassiutinut nalunaaruteqarluni allappoq.

Aningaasartuutigineqartartut annertuut

Taassuma naammagiinnarunnaarpaa angallattut amerlangaatsiartut unnueqqaartariaqartarnerat, taamatummi immikkut aningaasartuuteqartariaqartarmata.

- Innuttaasut ajornaannerusumik angalalertorsinnaanissamut pisinnaatitaaffeqartariaqarput, Aqqa Samuelsen erseqqissaavoq.

Taassuma erseqqissarpaa Diskolinep suliassaq nammassinnaanngikkaa, angallatit nutaanngililersimammata, avatangiisinut silallu qanoq issusaanut tulluarunnaarlutik.

Suliarinnittussat allat

- Angallannikkut kiffartuussinissamik isumaqatigiissutit ukiup tulliata naanerani atorunnaartussaassapput, 2021-miillu atuuttussat nutarterneqartussanngorlutik.Angallannikkut pitsaanerusumik ataqatigiinnerusumillu aaqqissuussisoqarnissaa piffissanngorpoq. Disko Linep suliaq tamakkiisumik kivissinnaanngippagu, innuttaasullu toqqissisimasumik angalasinnaanissaat qulakkeersinnaanngippagu Disko Line atorunnaarlugu allatut aaqqiisoqarsinnaanera tunuarsimaarfigineqartariaqanngilaq , Aqqa Samuelsen Naalakkersuisunut oqariartuuteqarpoq.