Piumasaqaateqartoqartoq: Partiit sisamat qinersisoqarnissaanik piumasaqartut

Inatsisartut Siulittaasoqarfiat Inatsisissatut siunnersuummik, qinersisoqarnissaanik taamaallaat anguniagaqarfiusumik tigusaqaqqammerpoq. Siunnersuuteqartuupput IA, Demokraatit, Partii Naleraq Atassullu.

Partiit sisamat Inatsisartuni amerlanerussuteqartut Inatsisartut Siulittaasoqarfianut qinnutigisimavaat, Ukiuunerani ataatsimiinnermi inatsisissatut siunnersuutip oqaluuserisassanut ilanngunneqarnissaa.

Inuit Ataqatigiit, Demokraatit, Partii Naleqqap Atassutillu Inatsisartuni ilaasortaatitaat piffissaanngitsukkut sooq qinersisoqarnissaanik kissaateqarnerminnut saqqummiussissumminni tunngavilersuuteqarsimapput.

- Matumuuna Inuit Ataqatigiit, Demokraatit, Partii Naleraq Atassullu sinnerlugit Inatsisartunut immikkut ittumik qinersineq pillugu Inatsisartut inatsisissaattut siunnersuut
saqqummiutissavara.

Pissutsit attanneqarsinnaanngitsut

- Nunatta inuisa ataatsimoornerulernissartik pisariaqartippaat, maannalu pissutsit
attanneqarsinaanngitsumi inissisimaleqqapput, tamannalu tunngavigalugu inatsisissatut
siunnersuut manna saqqummiupparput. Maanna politikkikkut pissutsit
attanneqarsinaanngitsumik inissisimanerat peqqutigalugu qinersinissaq
avaqqunneqarsinnaanngilaq.

- Taama naatsumik oqaaseqarlunga Inuit Ataqatigiit, Demokraatit, Partii Naleraq, Atassut
sinnerlugit siunnersuut Inatsisartunut oqaluuserisassanngortippara, IA-mi siulittaasoq Múte B. Egede partiit allat sinnerlugit allappoq.

Aamma atuaruk: Inatsisartunut qinersisoqassappat qinersinissaq kommunimut qinersisoqarnissaanut atatillugu unammillernarsinnaasoq

Inatsisartut Siulittaasoqarfiata maanna inatsisissatut siunnersuut aamma oqaluuserisassanut qaqugu ilanngunneqarsinnaanersoq nalilersussavaa. Partiilli siulersuisuisa sisamaasut neriuutigaat, siunnersuutip aqangu oqaluuserisassanngortinneqarumaarnera.

Partiini sisamani siulittaasuusut Múte Bourup Egede, Jens-Frederik Nielsen, Jens Napaattooq aamma Aqqalu Jerimiassen imatut allapput:

- Pisut partiillu Inatsisartuni amerlanerussuteqarluartut qinersinissamik kissaateqarlutik naqissuseereernerisa kingunerisaanik oqaluuserisassamik qinnuteqaateqarpugut. Oqaluuserisassanilu siullertut oqaluuserineqarnissaa qinnutigaarput. Inatsisartullu oqaluttarfiat taamaalilluni qineqqusaarfittut atorneqarnissaa pinngitsoortikkumallugu.

Powered by Labrador CMS