Piukkunnaatilinnik katerisitsinissaq: Amerlanerit Nunarput sinnerlugu unammersuaqataasinnaalissapput

Timersortarnerup iluani inuusuttut piukkunnaatillit sapaatip-akunnerani matumani pikkorivissutut timersortartunngornissamut piareersarlugit isummanik arlalinnik tuniorarneqarput.

Inuusuttut timersornermi piginnaanillit 16-it, Elite Sport Greenlandip piginnaanilinnik pikkorivissunngortitsiniarneranut atatillugu sapaatip-akunnerataa matuma naanerani katerisissimavai.

Piginnaanillit taakku 16-it kattuffiit aalajangersimasut assigiinngitsut suleqatigalugit toqqarneqarsimapput, katerisitsinermilu inuusuttut piginnaanillit timersuumminni pikkorinnerulersinneqarnissaat siunnerfigalugu isumannik tuniorarneqarlutik. Piginnaanillit taakku ilaatigut nammineq sungiusaasoqarnissamut, sungiusarnissap piareersarneqarnissaanut qasuersaartarnissamullu saqqummiiffigineqarput:

- Elite Sport Greenland-ip anguniagaraa piukkunnaatilinnik amerlanerusunik Kalaallit
Nunaanni peqalernissaq. Piukkunnaatillit amerlaneruppata, siunissami pikkorivissortut nunat tamalaat unammiuaarneranni soorlu VM, OL unammissutsinilu assingusuni amerlanerusinnaaneri ilimanaateqarnerusarmat, Elite Sport Greenlandimi siulittaasoq Nikolaj Christoffersen tusagassiorfitsigut nalunaaruteqarnermi oqarpoq.

Møller, Slettemark aamma Svan saqqummiisut

Timikkut sungiusarnissap saniatigut ilaatigut timersortartut assigiinngitsut isumassarsiffiusinnaasunik saqqummiipput. Saqqummiisut tassaapput Danmarkimi assammik arsarnermi nunanut allanut unammisartuusimasoq Lasse Svan, Martin Mølleri OL-ertoqarnissaanut imminut sungiusarneq pillugu saqqummiivoq, Ukaleq Slettemarkilu kajumissuseqarneq, tunniussimaneq nunamullu allamut nuunnerup qanoq ittuunera pillugit saqqummiilluni.

Siulittaasup Nikolaj Christoffersenip oqaatigaa, timersortartut ilikkakkatik kingusinnerusukkut sungiusaasunngussagunik atorsinnaagaat:

- Pikkorivissortutut unammisartunngornissaq sakkortusinnaavoq, sukataarnerpassuarnik imalik, tamannalu pillugu ESG-miit sakkussanik atorluarneqarsinnaasunik tunniussinissatsinnut suleqataarusuppugut, ineriartortitsineq ingerlattuarumallugu. Sakkussallu taakku aamma kingusinnerusukkut sungiusaasunngornermi atorneqarsinnaaneri
qularutiginngilarput, taanna oqarpoq.

Elite Sport Greenland GrønlandsBANKEN-imit, Tusass-imit Royal Arctic Line-millu aningaasaliiffigineqarsimavoq.

Powered by Labrador CMS