Pituffimmut nutaamik isumasioqatigiittoqarnissaa suli neriutigineqarpoq

Pituffimmut kiffartuussinissamut isumaqatigiissut Kalaallit Nunaannut iluaqutaanissaa suli neriutigineqarpoq.

Sapaatip akunnerata siuliani nunanut allanut ministerip Anders Samulsnip (LA) matoqqasumik isumasioqatiginerata kingorna taama naliliisoqarpoq.

- Qularutiginngilluinnarpara nunanut allanut ministerip suliaq pimoorummagu, Aleqa Hammond (NQ) oqarpoq.

Aaja Chemnitz Larsen (IA) isumaqataavoq.

- Pituffimmut kiffartuussinissamut isumaqatigiissusiornerit suli ingerlanneqartutut isigaara, taanna naliliivoq.

Puiuvineq

Pituffimmut kiffartuussinissamut isumaqatigiissutit 2014-imi amerikamiut 100 procentimik pigisaata Vectrus A/S ataaniittup Exelis Services A/S-ip tiguai. Tamanna kunngeqarfiup USA-llu illersornissamut isumaqatigiissummut paarlangalluinnarpoq, tassani erseqqissarneqarpoq qallunaat imaluunniit kalaallit ingerlatseqatigiiffii isumaqatigiissutigineqassasut. Isumaqatigiissummilu piumasaqataatit qallunaat nunaanni ingerlatseqatigiiffiup ataani suliffeqarfimmik pilersitsinikkut avaqqunneqarsinnaasut takunngitsoorneqarsimavoq.

- Nassuerutigisariaqarparpulli Kalaallit Nunaat aamma Qallunaat Nunaat puigungaqarsimammat, Aaja Chemnitz Larsen (IA) oqarpoq.

Træg partner

Suleqatigiissitat marluk sulingasuartussatut pilersinneqarsimangaluarput, taamaaliorsimanngillalli. Ukioq kingulleq qallunaat/kalaallillu suliariumannittussarsiuussinermi isumaqatigiissutit allanngortinneqarnissaat pillugu siunnersuutaat USA-mit itigartitsissutigineqarput. Ataatsimiititalialli maanna ukiuni tallimani sulereersimangaluartut aaqqiissutissamik suli ujartuisoqartoq, Aaja Chemnitz Larsen naliliivoq.

- Suliariumannittussarsiuussinermi piumasaqaatit allanngortinneqarnissaannik sulineq suli ingerlanneqarpoq. Piffissamik taama sivisutigisumik atuisoqarsimanera assut ajusaarnartoqartippara. Aammattaaq isumaqarpunga USA suleqatigalugu kingaassimasoq.

- Aaqqiissutissamilli nassaartoqarnissaa pingaaruteqarpoq, aamma pingaaruteqarpoq USA-p Kalaallit Nunaanniinnera Kalaallit Nunaannut iluaqutaanissaa. Tamanna Qallunaat Nunaata Kalaallit Nunaatalu soqutigisarilluinnaraat qularutissaanngilaq.