Pituffimmi tunillatsittoqaqqippoq
Pituffimmi ataatsimik coronavirusimik tunillatsittoqaqqippoq. Tamanna Nunatta nakorsaanerata Sermitsiaq.AG-imut uppernarsarpaa. Maanna sakkutooqarfimmi sisamat tunillatsissimalerput. Sulisut eqimattat amerlasuut maanna tunillatsissimanersut misissorneqaleruttorpoq.
Pituffimmi Covid-19-mik tunillatsittoqaqqissimasoq sisamanngornermi paasineqarpoq.
Tamannalu Nunatta nakorsaanerata uppernarsarpaa,
- Maanna misissuinerit aallartipput. Sulisut amerlasuut misissorneqalerput nappaat tuniluunnginnissaa qulakkeerniarlugu, Nunatta nakorsaanera Henrik L. Hansen Sertmitsiaq.AG-imut oqarpoq.
Maannalu suli ilisimaneqanngilaq tunillatsittoq tunillanneqarsimasunit pingasunit tunillanneqarsimanersoq imaluunniit tunillatsittut suli amerlanerunersut.
Tunillaassuuttoqalinnginnissaa anguniarlugu nappaalanersuaqartoqarneranut ataatsimiititaliaq aalajangerpoq juunip aallaqqaataata tungaanut Thulemut tikittoqaranilu Thulemit aallartoqassanngitsoq. Maleruaqqussut sivitsorneqassanersoq, Henrik L. Hansenip maanna oqaatigisinnaanngikkallarpaa.
- Tunillatsittoqaqqissimanersoq ulluni makkunani malinnaavigeqqissaassavarput, maannalu maleruaqqusat eqqarsaatigalugit allanik aalajangiussaqarnikuunngilagut. Soorunamilu maleruaqqusanik allanik pisariaqassappat pilersitsiumaarpugut Kalaallit Nunaanni tuniluuneq ilangassimatinniarlugu.
Pituffimmi tunillatsissimasut maanna pingasuupput, tunillatsissimasoq ataaseq peqqissisimavoq. Siulliit marluk tikittut US-miit coronavirus eqquppaat. Pingajuallu Pituffimmi tunillatsippoq. Taanna ersiuteqalernermigut misissortikkami tunillatsissimasoq paasineqarpoq. Ataaserlu aamma tunillatsissimasoq sisamanngornermi paasineqarluni.