Pituffimmi sakkutuut sungiusartut

Sakkutuut timmisartui Canadameersut USA-meersullu ulluni makkunani sungiusarput. Issittumi Sakkutooqarfik sungiusaqataanani nakkutilliisuuvoq.

Kalaallit Nunaata avannarpasinnerusortaani innuttaasut ulluni makkunani sakkutuut timmisartuinik takusaqartassagunik, Amalgam Dart-imik taaguuserlugu sakkutuut sungiusartut takusarsimassavaat.

Juunip qulinganiit 19-iata tungaangut sungiusartoqarpoq, sungiusarnerlu Amerikap Avannaata issittortaani Alaskamiit Pituffik tikillugu ingerlanneqarluni.

Canadami USA-milu sakkutuut suleqatigiillutik ’issittup silaannartaanik illersuilluni sungiusarnertut’ taallugu sungiusartuupput.

Issittumi sakkutooqarfik sakkutooqarfimmi nakkutilliisoqartoq

Nunat taakku marluk illersornissaq pillugu suleqatigiiffeqarput, suleqatigiinneq NORAD-imik (The North American Aerospace Defense Command) taaguuteqartoq sungiusartitsisuuvoq, tassungalu atatillugu ilaatigut Pituffiup eqqaani najugaqartut nalunaarfigineqarsimapput, sungiusarnerup nalaani silaannakkut angallattoqarnerulissasoq.

Sungiusarnermit assilisat ilaatigut takutippaat, Canadamiut timmisartuutaat malersuut Pitsuffimmut mittoq.

Issittumi Sakkutooqarfiup Sermitsiaq.AG-mut ilisimatitsissutigaa, sakkutooqarfik sungiusarnermi Amalgan Dart-imi peqataanngitsoq, sungiusarnermulli atatillugu nakkutilliisuusoq, tassa naalagaaffeqatigiit oqartussaaffianni sungiusartoqarnera pissutigalugu.

Aamma nakkutilliisoqarpoq, Issittumi Sakkutooqarfimmut iluaqutaasinnaasunik sungiusarnermi misilittagaqalernissaq anguniarlugu.

Powered by Labrador CMS