Pituffimmi sakkussiorneq
Illersornissamut qisuariarneruvoq ulorianartorsiornissaq saassunneqarnissarlu pakkersimaarniarlugit, USA-p Pituffimmik nutarteriniarnera sakkussalersuiniarneralu pillugit illersornissamik immikkut ilisimasalik oqarpoq.
Qanittukkut Martin Breum Weekendavisenimi Sermitsiamilu allaaserisaqarpoq qulequtalimmik »Issittumi sakkussiorneq«, oqaluttuaralugu USA-p Pituffik (Sakkutooqarfik) annertuumik nutarteriffiginialeraa.
Aviisi Sermitsiaq taama allappoq.
Taamaariarmat IA tunuliaqutaralugu Folketingimut ilaasortaq Aaja Chemnitz Larsen nunanut allanut tunngasunut ministeri Jeppe Kofod arlalinnik apeqquteqarfigaa, Amerikamiut sakkutooqarfianni qanoq pisoqalernersoq, naalakkersuisullu ilisimatinneqarsimanersut.
Apeqqutai nunanut allanut tunngasunut ministerimit suli akineqanngillat, Forsvarsakademimili lektorip illersornissamillu immikkut ilisimasallip Peter Viggo Jakobsenip, Amerikamiut pilersaarutaannut suut pissutaanersut eqqoriarsinnaavaa.
– Amerikamiut isertuussimanngilaat russit Franz Josefs Landimi sakkutuulersornerat Issittumik ulorianartorsiortitsisoq. Amerikamiut qallunaallu isertortumik paasiniaasartuisa arlaleriarlutik tikkuartarsimavaat russit qeqertanit taakkunanit, Svalbardip kangiani inissisimasunit, Amerikamiut sakkutooqarfiat sukkasuumik saassussinnaagaat, tamannalu USA-mut ajornartorsiutaavoq, tassa radari Pituffimmiittoq Amerikamiut saassunneqarnermi kalerrisaariviinut ilaammat pingaarutilik. Tamanna peqatigalugu avataarsuani attaveqarnermut atatillugu radari pingaaruteqarpoq, tamanna USA-p nutaaliaasumik sorsunnermi tunngavigisorujussuummagu. Pituffik pingaaruteqarpoq, taamaattumik Amerikamiut isumaliutigisariaqarpaat Issittumi ulorianartorsiulerneq tamanna qanoq ililluni pakkersimaarsinnaanerlugu. Taamaaliorsinnaapput sakkutooqarfimmi silaannakkut saassunneqarnermut illersuutinik timmisartunillu malersuutinik inissiinikkut sakkussiornikkullu, russit sakkutooqarfianni sakkussiorneq illua’tungilerniarlugu.
Aviisimi Sermitsiami atuarnerusinnaavutit: