Pituffik qangatut nukittutigiunnaarsimavoq
USA-p Pituffimmi sakkutooqarfia qangatut pingaaruteqartigiunnaarsimavoq. Maaniluunniit sakkoqanngilagut, sakkutooqarfiup pisortaa oqarpoq
Pituffimmi sakkutooqarfik, Thule Air Base, qangaanerusoq 10.000-it angullugit amerlassusilinnik inoqarsimavoq, radarersuarlu USA-p kangianit missilit atorlugit saassussisoqaratarsinnaaneranut pakkersimaartitsiniutitut periarfissaani aalajangiisuusimavoq.
USA Pituffimmi ullumikkut 200-nit ikinnerusunik sakkutooqarpoq, barakkillu siammasissut hangarillu imaqarpianngitsut USA-p nunarsuarmi qeqertat annersaanni najuunnermik qaffasilluinnartumik pingaartitsineranut ersiutaaqqajanngillat.
Aamma naak præsident Donald Trump Kalaallit Nunaata pisiarinissaanik kissaammik saqqummiussisimagaluartoq, qeqertaq illersornissaq eqqarsaatigalugu pigissallugu pitsaasuussammat.
Sakkutooqarfiup ullumikkut pisortaata, oberst Timothy Bosip, qallunaat tusagassiortut pingasunngormat sakkutooqarfimmut tikilluaqquai.
Tassani ilaatigut nassuiaavoq, Pituffimmi sakkutooqarfik, missilinik saassussisoqarsinnaaneranut mianersoqqusisinnaanermi saniatigut, tassaasoq Amerikamiut qaammataasatigut paasissutissanik assersuutigalugu Afghanistanimit aallerfigisinnasaasa ikittuinnaasut ilagigaat.
Tamatumunnga pissutaavoq paasissutissat tamakkua qaammataasanit immikkut ittunit, nunarsuarmik Qalasersuarmit Sikuiuitsumut Kujallermut kaaviisunit, Ækvatorikkut kaaviisunut taarsiullugu, katersorneqartarnerat.
Tamatuma pingaaruteqarnera oqaatiginiarneqaraluartoq sakkutooqarfiup pisortaata Bosip nassuerutigaa, Thule Air Base pissusiviusuni illersorneqanngilluinnartutut inissisimasoq.
- Maannakkorpiaq pissusiviusuni maani iluameersunik illersuutissaqanngilagut, avinngarussimasorujussuarmiikkatta, oqarpoq nangillunilu:
- Nunakkut aarlerinartorsiortitsisinnaasunik pissutai ersarissunik ernummateqarpallaanngilagut, aamma silaannarmit aarlerinartorsiortitsisinnaasut maannakkorpiaq iluamik akissutissaqartinngilavut.
Silaannarmit aarlerinartorsiortitsinermik apeqqut sammineqalerpoq Rusland Issittumi qeqertani Franz Josefs Landimi sakkutooqarfimminik Nagurskoyemik annertusaareersorlu.
Nagurskoye maanna ilaatigut mittarfeqarpoq, russit timmisartuisa sorsuutit qangattarfigisinnaasaannik Kalaallit Nunaatalu kangiata sineriaanut – orsersornermikkullu aamma Pituffimmi sakkutooqarfimmut – annguffigisinnaasaannik.
Pissusiviusoq tamanna tunngavigalugu illersornissamut ministeriusimasup Claus Hjort Frederiksenip (V) qineqqusaarnermi siunnersuutigaa, Danmark timmisartunik sorsuutinik Kalaallit Nunaannut inissiissasoq.
Kisianni Timothy Bos naapertorllugu, Amerikamiut Pituffimmi imaluunniit Pituffiup eqqaani atortussaateqanngillat, russit timmisartuisa qaartartorsuutit radareqarfinnik suujunnaarsitsiniarnerinut pinngitsoortitsiniutaasinnaasunik.
- Timmisartoq mittarfiup radariatigut aggersoq takusinnaassagunarparput, kisianni annerusumik minnerusumilluunniit tamannaannaavoq.
Timmisartuuteqanngilasi unitsitsisinnaasunik?
- Aap, timmisartunik ataavartumik maaniititaqanngilagut. Aamma kingullermik ukiut sisamat tallimalluunniit matuma siorna maani timmisartoqarpoq sorsuutimik.
Aqqartartoqanngilaq timmisartunik nakkartitsisinnaasunik?
- Uanga naalakkatut atuunnerma nalaaniunngitsoq.
Sakkoqanngivippusi?
- Taamaallaat sakkutuualuit immikkut sungiusarsimasut tigummiartakkanik annikitsunik sakkoqartut. Kisianni Issittumi aarlerinartorsiornerup allanngorsimanera tunngavigalugu tamanna Danmark Canadalu peqatigalugit isiginiarparpu.
Amerikamiut oqaluttuarisaanermi Pituffimmi eqqaanilu sakkoqarnissamut tunuarsimaanngilluinnarsimagaluarput.
Timmisartoq qaartartorsuut B-52 sakkutooqarfiup ungasinngisaanut 1968-imi nakkarmat, assersuutigalugu paasinarsivoq, qaartartorsuarnik brintbombinik sisamanik useqarsimasoq.
Amerikamiut sakkutuuisa saniatigut sakkutuujunngitsut qallunaat, kalaallit Amerikamiullu 400-t missaanniittut Pituffimmi ataatsimut katillugit 550-600-inik inoqartumi sulisuupput.