Pituffik pillugu suliami siuttoq toquvoq
Hingitaq 53-imi siulittaasuusimasoq, Ussarqak Qujaukitsoq, danskit naalagaaffiannut taarseeqqusissuteqarnermik suliaqarsimasoq toqukkut qimaguppoq. Taanna 70-nik ukioqarpoq
Uummannami innuttaasut Pituffimmi sakkutooqarfiup sanaartorneqarneranut atatillugu pinngitsaalisaallutik nuutsinneqarnerannut illuatungiliuttuni nuimasuusoq, Ussarqak Qujaukitsoq, toqukkut qimaguppoq. Taassuma ernera, Vittus Qujaukitsoq, aatsitassanut naalakkersusisoq ilisimatitsivoq.
- Ullaaq asasaga ataataga alianaraluaqisumik SANAmi perululluni napparsimareerluni eqqissivoq. Annaasaq erlinnaraluassusia, Vittus Qujaukitsoq, Facebookimi sisamanngornermi ullaap tungaani taama allappoq.
Ussarqak Qujaukitsoq 1953-imi Uummannamit Qaanaamut pinngitsaalisaallutik nuutsinneqartut 116-iusut ilagaat, taannalu peqatigiiffimmik Hingitaq 53-imik pinngitsaaliilluni nuutsitsinermut misissuisumik pilersitsisuuvoq. Danskit naalagaaffiannut taarseeqqusissuteqarnermi, Pituffik pillugu suliamik taagorneqartumi, 1996-imi aallartinneqartumut siuttuusimavoq.
Inuit pinngitsaalisaallutik nuutsinneqarsimasut kinguaavilu peqatigalugit 235 millionit koruuninik piumasaqarput, kiisalu inunnut pinngitsaalisaallutik nuutsitaasimasunut immikkut 250.000 koruuninik piumasaqarput, nunaqarfigisimasaminni najugaqarsinnaallutillu atuisinnaatitaanerminnik tunngavilersuuteqarlutik.
Nunaqarfimminnut uternissaminnik piumasaqarnerminni akuerineqanngillat, kisianni Danmarkimi eqqartuussiviit qullersaata novembarip 28-anni 2003-mi eqqartuussimmini nuutsitsineq pinngitsaaliinerusoq naqissuserpaa, taakkulu katillugu 1,7 millionit koruunit missaanninnik pissarsiaraat, aammalu danskit naalagaaffianit utoqqatsertoqarluni.
Assit takukkit: Uusarqak Qujaukitsumut nersornaat sølvi
Piumassusilimmik annaasaqarneq
Kalaallit Nunaanni ICC-mi siulittaasuusimasup, Aqqaluk Lyngep, ukiorpassuarni Ussarqak Qujaukitsoq suleqatigisimavaa, ilaatigut Inatsisartuni 1980-ikkunni suleqatitut, aamma ICC-mi siulersuisuni, minnerunngitsumillu Pituffik pillugu suliami.
- Ukiuni qulikkaani kingullerni Avanersuarmi inuit pingaaruteqarnerpaat ilaat toquvoq. Suliumatuumillu annaasaqarpugut, Aqqaluk Lynge, Sermitsiaq.AG-mut oqaluttuarpoq.
Taassuma oqaluttuaraa, Ussarqak Qujaukitsup, pinngitsaalisaalluni nuutsitaaneq pillugu paasiniaalluni anguniakkani naammassiniarlugu angunni neriorsiornikuusimagaa. Tamannalu naammassisimallugu.
- Uanga nammineq inuttut Ussarqak Qujaukitsoq ataatsimut isigalugu Avanersuarmi Issittumilu sulininnut atatillugu ilinniartitsisorisimagakku qujamasuttorujussuuvunga, Aqqaluk Lynge oqarpoq.
Naalakkersuinikkut sulinera
Ussarqak Qujaukitsup naalakkersuinikkut suliaqarnera 1971-imili kommunalbestyrelsimut ilaasortanngorami aallartippoq, 1984-imilu Inatsisartunut siullermik qinigaaqqaarpoq.
Ussarqak Qujaukitsoq 2016-imi Inatsisartut Nersornaataannik sølviusumik nersornaaserneqarnikuuvoq, ‘inuiaqatigiinni kikkunnut tamanut atugassarititaasut pitsanngorsarniarlugit ilungersorluni suliniuteqarsimanera nersorniarlugu’.