Pituffik pillugu politikkikkut inaarutaasumik suliaq

Qallunaat suliffeqarfiutaat pingasuusut tassaasut Copenhagen Arctic, Per Aarsleff, aamma Greenland Contractors, Amerikamiut sakkutuuinit timmisartortartunit suliariumannittussarsiornermi saqqummiunneqarsimasut tusarniaassutigeqqinnissaanut itigartinneqarput. Tamatuma kinguneranik Pituffik pillugu inatsisitigut saqitsaanneq suliffeqarfinnut taakkununnga pingasunut ajorsarneruvoq.

- Aalajangiussaq nalilersoqqinneqassanngitsoq nalunaarfigineqarpugut. Tamatuma kinguneranik nutaamik suliariumannittussarsiuussisoqassanersoq taamaallaat politikkikkut aalajangerneqarsinnaalerpoq, Greenland Contractorsip pisortaa Peter Kofoed oqarpoq.

Greenland Contractorsip sullissinissamut isumaqatigiissutini maannamuugallartoq oktobarip aallaqqaataannut 2017-imut sivitsortikkallarsimavaa, tamatumali kingorna Exelis Servicesip sullissinissamut isumaqatigiissut tigussagaa pilersaarutaavoq. Greenland Contractorsimili suli isumaqartoqarluni suliariumannittussarsiuussinermi atorneqartuni kukkuneqartoq, tamannalu kinguneqartinneqartariaqartoq.

- Maannamut isummernerput allanngunngilaq, tassa isumaqaratta sukkanerpaamik nutaamik suliariumannittussarsiuussisoqartariaqartoq, taamaalilluni naapertuilluartumik naligiimmillu unammilleqatigiittoqarnerata kingorna ajugaasumik aalajangiussisoqarniassammat, tamatumani kalaallit soqutigisaat eqqarsaatigineqarlutik aamma illersoqatigiinnissamut isumaqatigiissutip anersaava eqqaamaneqarluni.

- Suliassap aalajangiiffigineqarnissaa nukinginnarsivoq, tassa suliap ingerlanneqarnerani nutaamik suliariumannittussarsiuussisoqassappat, sanaartugassanik suliassinneqartartumik toqqaasoqarnissaa aamma ilaatigut sanaartugassanik suliassinneqartartumut nutaamut tunniussinissaq eqqarsaatigalugit, oktobarip aallaqqaataa nallertinnagu tamakkua tamarmik inissinneqariissappata, Peter Kofoed oqarpoq.

Sermitsiami atuaqqigit:

Sermitsiaq Uge 51 2016

Klik her for at læse