nalunaarusiaq
Pituffik pillugu nalunaarusiaq tamanut saqqummiunneqangajalersoq
Nalunaarusiaq Kielsenimit ivertinneqarnermini suliassiissutigineqartoq naammassineqaramili sivisuumik uninngasimavoq. Maanna nutserneqareersimalerpoq ilaatigullu Danmarkimit USA-millu innuttaasunut ungasinngitsukkut saqqummiunneqannginnerani tamuaneqarsimalluni
Eqqartuussissuserisup misissuinera Amerikamiut suliffeqarfiutaata Vectrusip Pituffimmi sakkutooqarfimmi kiffartuussinissamut isumaqatigiissummik pissarsineranut atatillugu maani kikkut kukkuluttorsimanerannik qulaarisussaq qularnanngitsumik ungasinngitsukkut tamanut saqqummiunneqassaaq.
Taama Namminersorlutik Oqartussani atorfillit qullersaat Søren Hald Møller, suliamik siuliminit akerlerineqaqisumit Svend Hardenbergimit, suliap ingerlasimaneranik misissuinerup qulaajaanerani pingaarnertut inuttaasut ilagisassaattut ilimagineqarsinnaasumit, kingornussisimasoq, oqarpoq.
Nalunaarusiaq atuaqqissaarlugu
Nalunaarusiaq juulimili naammasineqarpoq, assigiinngitsunilli pissuteqartumik uninngatinneqarsimalluni. Aallaqqaammut Naalakkersuisut allanit takuneqartinnagu qanimut atuaqqissaarusuppaa, tamatumalu kingorna kalaallisuunngortinneqarnera, sivisunaartoq, pissutaalerluni. Nutserneqarnerali maanna tassa naammassivoq, piffissamilu kingullermi KNR-imit paasissutissanik takunnissinnaatitaanermik qinnuteqaat – AG aamma qinnuteqarsimavoq – kinguaattoornermik kinguneqarsimalluni.
Tusagassiortunimmi takuneqarsinnaalersinnagu attuumassuteqartunut, akerliliissuteqarnissamut akuerisaasimasunut, takutinneqarsimavoq. Allakkiaq innuttaasunit atuarneqarsinnaalersinnagu taassuma ilaa qanoq annertutigisoq paasinarunnaarsarlugu qaava
tigut titartarneqassanersoq suli ilisimaneqanngilaq.
Inatsisilerinikkut nalilersuineq
- Septembarimi paasissutissanik takunnissinnaatitaanermik qinnuteqaammik tigusaqarpugut, tamannalu qanoq akuersaassaneripput suli sulissutigaarput. Taama ittumik tigusaqarnermi soqutigisallit avataaneersut aperineqartartut akuersaarnermut atatillugu oqaaseqaatissaqarnersut. Tamatumani oqaaseqaatinik tigusaqarpugut, taakkualu inatsisilerinikkut nalilersuleruttorpavut, taakkunani suut mattunneqarnissaat imaluunniit ilisarnarunnaarsarneqarnissaat pineqarmata. Akissut kingulleq sisamanngornermi pissarsia- raarput, naalakkersuisoqarfiup pisortaa Søren Hald Møller oqarpoq, paasissutissanillu takunnissinnaatitaanermik qinnuteqaat sapaatip-akunnerisa arlaqanngitsut iluanni akisinnaassanerarlugu naatsorsuutigalugu.
Eqqartuussissuserisup misissuineranit Pituffimmi kiffartuussinissamut isumaqatigiissutip, Greenland Contractorsimit aallaqqaammut annaaneqartup, suliariumannittussarsiuunneqarnerata ingerlarngata eqqumiitsup isumagineqarnerani kalaallit tungaannit kukkusoqarsimanersoq qulaajaavigineqartussaavoq. Suli tigussaanerusumik kukkunerit atorfilittaqarnikkut politikkikkulluunniit pisimanersut, aamma taakkua Naalakkersuisut siulittaasuata Naalakkersuisoqarfiani imaluunniit Nunanut allanut Pisortaqarfimmi pisimanersut.
Pituffik pillugu Sermitsiaq.AG-imi allaaserineqartut tamaasa uani atuakkit
Allaaserisaq tamaat sapaatip-akunnerani uani AG-mi saqqummertumi atuaruk, pisiniarfinni imaluunniit uani ataani e-avisitut pisiarisinnaavat: