Pituffik pillugu isumasioqatigiinnissamut oqaaseqartartut ministeri qaaqqugaat

Aaja Chemnitz Larsen (IA), Karsten Hønge (SF), Roger Matthisen (Alternativet) aamma Christian Juhl (Enhedslisten), Pituffimmi mittarfimmut kiffartuussinissamut isumaqatigiissut pillugu, nunanut allanut ministeri Kristian Jensen isumasioqatiginissaanut kissaateqarput.

Amerikarmiut suliffeqarfiutaata Exelisip Pituffimmi kiffartuussinissamut isumaqatigiissut pissagaa, Amerikami eqqartuussiviup juunimi aalajangerpaa.

Apeqqutit tallimat
Maannalu politikerit illuatungiliuttut nunap karsianut isertitassat pillugit ernumassuteqalerput.

Apeqqutit uku akineqarnissaat kissaatigaat:

1. Amerikami eqqartuussiviup aalajangiinera, kiffartuussinissamut isumaqatigiissutit qallunaat imaluunniit kalaallit suliffeqarfianut tunniunneqarnissaanut qulakkeerinninnissamut qanoq kinguneqartitsissanersoq naalakkersuisut isumaqarpat?

2. Kiffartuussinissamut isumaqatigiissut qallunaat imaluunniit kalaallit suliffeqarfianut tunniunneqarnissaa, suliffiillu maanna amerlassusaat allanngorniarnagit sulisut naalagaaffimmi innuttaasuunissaat qulakkeerniarlugu naalakkersuisut qanoq iliorniarpat?

3. Iluatsinngippat aningaasaqarnikkut kalaallinut inuiaqatigiinnut sunik sunniuteqarsinnaaneranut, tassani suliffinnik, ilinniarfinnik annaasaqarneq ilanngullugu naalakkersuisut qanoq isumaqarpat?

4. Isumaqatigiissut qallunaanut kalaallinulluunniit tunniunneqanngippat, kalaallinut inuiaqatigiinnut ajortumik sunniutit aaqqinniarlugit Naalakkersuisut qanoq iliorniarpat?

5. Amerikami innuttaassuseqartut Illersornissamut Isumaqatigiissut 1951-imeersoq naapertorlugu Kalaallit Nunaanni akileraartassanngitsut ilumoornersoq Naalakkersuisut uppernarsarsinnaavaat? Taaamaassappat kalaallit soqutigisaat qulakkeerniarlugit naalakkersuisut isumaqatigiissuteqarusussinnaappat?

Danskit naalakkersuisuisa kalaallillu oqartussaasuisa arlalli 2013-imi suliarinnittussarsiuussinermut malittarisassat allanngormatigit suliaq aallartippoq, taamaalilluni suliffeqarfiit qallunaanit aamma kalaallinit pigineqartut kisimik qinnuteqartarunnaarput.

Atuaruk: Suliariumannittussarsiuussinermut malittarisassat allanngorsimaneri Naalakkersuisunit ilisimaneqartoq

Danskit kalaallillu politikeriisa taamani oqaatigaat, suliarinnittussarsiorneq isumannanngitsoq.

Akileraarutit ikinnerulertut?
Pitummit akileraarutit isertinneqartut Nunatsinni akileraatinit isertitat 10 procenterigai nalilerneqartarpoq.

Illersornissamut Isumaqatigiissut 1951-imeersoq naapertorlugu Amerikami innuttaassuseqartut Kalaallit Nunaanni akileraartassanngillat, taava Pituffimmi sulisut Amerikarmiuinnavinngorpata, Nunatsinni asuliinnaanngitsumik aningaasaqarnikkut kinguneqartitsissaaq.

Atuaruk: Eqqartuussinerup kingorna: Vectrus Thulemi aallartinnissamimut qilanaarpoq