Pituffik pillugu isumasioqatigiinneq Kangerlussuaq pillugu apeqquteqalersitsisoq
Illersornissaqarfik Kangerlussuaq pillugu qanoq pilersaaruteqarneranik nassuiaanissamut forsvarsministeri qaaqquneqarpoq
Folketingimi ullumi USA aamma Pituffik pillugu isumasioqatigiinneq tunngagaluarpoq, kisinni Kangerlussuaq pillugu apeqqutinik qaqitsiffiuvoq.
Udenrigsministeri Anders Samuelsen (LA), Kalaallit Nunaat pillugu ataatsimiititaliami Christian Juhlip (EL) apeqquteqarnera tunuliaqatugialugu matoqqasumik isumasioqatigiinnissamut aggersarneqarpoq.
- Ministeri isumaqatiginninniarnerit pillugit qanoq ilisimatitsissuteqarsinnaava, oqarnera naapertorlugu USA-p isumannaallisaanermut siunnersortaata John Boltonip Twitterimi 7. februaarimi 2019-imi nalunaarummi, Issittoq pillugu suleqatigiinnermi ingerlanneqarsimasut, aammalu tassunga tunngatillugu Pituffimmi kiffartuussinermut isumaqatigiissutit isumaqatiginninniutigeqqinnissaannik suut piumasaqaatigineqarsimanersut? taama apeqquteqartoqarpoq.
Forsvarsministerip isumasioqatigineqarnera
Isumasioqatigiinneq matoqqasuummat ataatsimiititaliamik ilaasortat tassanngaanniit eqqartuisinnaanngillat. Kisianni Kangerlussuaq oqaluuserineqarsimavoq, naak tamanna Pituffimmut tunngagaluartoq.
- Paasissutissat pissarsiarisagut tunuliaqutigalugit Kalaallit Nunaat pillugu ataatsimiititaliami forsvarsministeri peqatigalugu Kangerlussuarmut tunngatillugu matoqqasumik isumasioqatigiittoqarnissaanik qinnuiginnippunga, tassani qallunaat naalakkersuisui Kangerlussuarmut tunngatillugu qanoq piniarnerat paasiniarlugu, Aaja Chemnitz Larsen (IA), ataatsimiinnerup kinguninngua taama oqarpoq.
Illersornissaqarfiup Kangerlussuaq atuinnarusukkaa, forsvarsministerip Claus Hjort Frederiksenip (V) marsimi nalunaarutigaa. Amerikamiut illersornissaqarfiata aamma Kangerlussuaq suli pisariaqartikkaa, Lars Løkke Rasmussenip (V) KNR-imi apersorneqarnermini aamma ilanngullugu oqaatiginikuuaa.
- Kangerlussuaq ammatiinnarneqarpat aningaasartuuterpasuusussaasut nalunngilarput. Pilersaarummik iluameersumik peqarnissaa qulakkeertariaqarparput, aamma Kangerlussuarmi najugaqartunut erseqqissaasoqarnissaa.
USA-mit aningaasaliisoqangajalinngitsoq
Amerikamiut illersornissamut ministeriata tullersortaata John Roodip ukiaq nalunaarutigaa, kalaallit mittarfeqarfiini aningaasaliinissaq isumaliutersuutigineqartoq. Kisianni tamatuma pinissaa ungasippasippoq.
- Oqariartuutip nassuiarneqarnera paasisaqarfigilaarparput, kisianni inaarutaasumik aaqqiissutissaq pillugu paasisaqarfigivallaanngilarput. Matumani ersarissumik aaqqiissuteqartoqarnissaa ungasittoq isumaqarpunga, Aaja Chemnitz Larsen (IA) oqarpoq.