Pituffik pillugu aaqqiissuteqarnissaq ungasittoq

Kiffartuussinermut isumaqatigiissut pillugu akerleriinnermi aaqqiissuteqarnissaq suli sivitsoqqippoq. KNR taama allaaserisaqarpoq.

Pituffimmi kiffartuussinermut isumaqatigiissut pillugu akerleriinnermi suli aaqqiissuteqartoqarnavianngilaq.

Folketingimi ilaasortap, Aaja Chemnitz Larsenip apeqquteqaataanut nunanut allanut ministeri Anders Samuelsen akissuteqarluni ilaatigut allappoq, ‘suliaq inatsisitigut politikkikkullu naammassiuminaappoq’, ‘taamaattumik siunissami qaninnermi aaqqiissuteqartoqarsinnaanngilaq’. KNR taama allaaserisaqarpoq.

Amerikamiut illersornissaqarfiata 2014-imi amerikamiut suliffeqarfiat Exelis Services toqqarpaa, taakku kiffartuussinermut isumaqatigiissutit 2017-imi tiguaat. Kisianni illersornissamut isumaqatigiissummi ingerlatseqatigiiffik Danmarkimeersoq/Kalaallit Nunaanneersoq kiffartuussinermut isumaqatigiissummik tunniussiffigineqartassasoq isumaqatigiissutigineqarnikuuvoq. Taamatut aalajangersaaneq amerikamiut ingerlatseqatigiiffiata Vectrusip Danmarkimi Exelis Services pilersillugu avaqquppaa.

Pituffik pillugu siunissami isumaqatigiissusiornissamut atatillugu Nunatta Danmarkillu siunnersuutaat USA-p marloriarlugu itigartissimagai ukiormanna februarimi KNR-imi saqqummiunneqarpoq.

Powered by Labrador CMS