isumaqatigiissutit

Pituffik: Nunatta Danmark tatisimavaa

Nunat avannarliit pillugit folketingimi marlunngorpat oqallittoqassaaq. Kalaallit folketingimi ilaasortaasut Pituffik pillugu statsministerimut apeqquteqassamaarput

Siumumit Doris Jakobsen aamma Inuit Ataqatigiinnit Johan Lund Olsen - Folketingip ammarneqarnerani assilineqartoq - assi toqqorsivimmit

Folketingimi nunat avannarliit oqallisigineqarnerini statsministeri Helle Thorning-Schmidt (Socialdemokraterne) siullermeerluni apeqquteqarfigineqarsinnaassaaq.

Greenland Contractorsip Pituffimmi sullissinissamut isumaqatigiissutaata sivitsorneqannginnera pillugu folketingimi ilaasortat Doris Jakobsen, Siumut, aamma Inuit Ataqatigiinni Johan Lund Olsen apeqquteqassamaarput.

Nunani avannarlerneersut folketingimi ilaasortaatitaqartut tassa statsministerimut pisut pillugit apeqquteqarsinnaassapput.

Pituffimmi sullissinissamut isumaqatigiissut pillugu Nunarput pillugu oqaaseqartartut Finn Sørensen, Enhedslisten, aamma Anette Vilhelmsen, SF, nunanut allanut ministeri Martin Lidegaard, Radikale Venstre, isumasioqatigiinnissamut qaaqquaat.

Oqaatigineqartut paasiuminaatsinneqartut
Pituffik pillugu nunanut allanut ministerip tusagassiutinut nalunaarutaa Doris Jakobsenimit paasiuminaatsinneqarpoq.

Sullissinissamut isumaqatigiissutit pillugit tusagassiutinut nalunaarummi ilaatigut allappoq Pituffimmi sullissinissamut isumaqatigiissutigineqartoq amerikarmiut suliffeqarfiutigigaat. Isumaqatigiissuteqarnissamut piumasaqaatit malinneqarsimasut ilaatigut oqaatigineqarpoq. Aningaanut tunngatillugu aamma Exelis Servicep isumaqatigiissuteqarfigineqarnera inatsisit iluini isumaqatigiissuteqartoqartoq oqaatigineqarpoq.

- Danmarkip USA-llu 1951-mi isumaqatigiissutaat malillugu oqaatigineqartut tupinnartoqartippakka. Pituffimmimi kalaallit suliffeqarfii salliutinneqartussaapput. Paasivarpullu amerikarmiut suliffeqarfiat sullissinissamik isumaqatigiissusiorfigineqarpoq, taamaattussaanngikkaluarpoq, Doris Jakobsen oqarpoq.

Inuit Ataqatigiinnit folketingimi ilaasortaq Johan Lund Olsen Doris Jakobsenip oqaasii taperserpai.

Powered by Labrador CMS