ataatsimeersuarneq

Pitsaaliuinermi siunnersortit pujortassaarnermut pikkorissartut

Nunatsinni pitsaaliuinermik siunnersortit ulluni makkunani Nuummi ataatsimeersuaatigalutik, namminneq kissaateqarsimanerat naapertorlugu pujortartarunnaarsitsiniarnermi ilitsersuisutut pikkorissartinneqarput

Pitsaaliuinermi siunnersortit nunatsinni tamarmit aggerfeqartut 25-t Nuummi ulluni makkunani ataatsimeersuarput

Peqqissutsimut naalakkersuisoqarfiup pitsaaliuinermik siunnersortit nuna tamakkerlugu aggerfeqartut Nuummi ulluni makkunani ataatsimeersuartillugillu pikkorisartippai.

Ataatsimeersuarnermi sammineqarpoq peqqissutsimut tunngatillugu perorsaaneq, pitsaaliuinermilu siunnersortit ilaatigut paasisaqarfigisussaavaat ‘peqqissuseq pitsanngortinniaraanni qanoq ilioraanni pitsaanerpaajua? Iliuusissat suut atorneqalissappat? Peqqinnerulersitsiniarnermi qanoq akuutitsisoqassava?’.

- Pitsaaliuinerup peqqinnerulersitsiniarnerullu assigiinngissutaat paasisaqarfigilluarpagut. Pitsaaliuilluni peqqinnerulersitsiniarluniluunniit imaluunniit taakku arlariit suliaqarfigissagaanni anguniakkat periutsillu assigiinngillat. Paasisimavarput peqqinnerulersitsiniarluni sulineq qanoq pingaaruteqartiginersoq, aamma pitsaaliuinermik suliaqarnitsinni, taama oqarpoq Eva Kirkegaard, Kommuneqarfik Sermersuumi pitsaaliuinermi siunnersortaasoq.

Taama Namminersorlutik Oqartussat tusagassiuutinut nalunaaruteqarput.

Pujortartarunnaarsitsiniarnermi ilitsersuisutut pikkorissartarneq
Ataatsimeersuarnermut ilanngullugu aamma pitsaaliuinermi siunnersortit namminneq kissaateqarsimanerat naapertorlugu pujortartarunnaarsitsiniarnermi ilitsersuisutut pikkorissartinneqarput.

Pitsaaliuinermi siunnersortit illoqarfimminni nunaqarfimminniluunniit meeqqat inuusuttullu pujortartarunnaarsitsiniarluni pikkorissartinneqarnissaannut sakkussaqalertussaallutik.

Kuffertimik angerlamut nassatassaminnik tunineqarput aamma
Pitsaaliuinermi siunnersortit kuffertinnguamik nerisat, pujortartarneq, imigassaq/ikiaroornartoq timillu aalatittarnera pillugit atortussanik imaqartumik aamma tunineqarsimapput.

Kuffertip imarai, Namminersorlutik Oqartussat nassuiaanerat naapertorlugu, innuttaasunik kimeqarluartumik ataatsimiisitsinissani atugassat, soorlu makkuusut akunnattoorutinik pinnguaat, nalorsitsaarinerit, minnerunngitsumillu usb-stikki tv-kkut aallakaatitassanik sisamaasunik imaqartoq taaguuteqartunik ’Periarfissaqarputit’, taakku qanoq ililluni peqqinnarnerusumik inuuneqarnissamut isumassarsisitsisinnaapput.

Pitsaaliuinermik siunnersortit ataatsimeersuartinneqarnerat ataasinngornermi aallartittoq sapaatiuppat naammassissaaq.

Powered by Labrador CMS