Pitsaaliuinerit ataatsimut katersorneqassapput
Naalakkersuisut pitsaaliunermik immikkoortoqarfii tamarmik PAARISA-p ataaniilissapput
Pitsaaliuinermi suliniutit Naalakkersuisut patajaallisarniarpaat, aamma Peqqiissutsimut Naalakkersuisoqarfimmi, Peqqinnissamut Pitsaaliuinermullu Aqutsisoqarfimmi, Isumaginninnermut Aqutsisoqarfimmi aammalu Allorfimmi suliniutit siornatigut inissisimasimasut ataatsimut katersorneqarnissaat aalajangiussimallugu.
Pitsaaliuinermut immikkoortortaqarfiup suliniutit ingerlanneqartut ataqatigiissassavai, suliniutillu oqartussaasoqarfiit assigiinngitsunik suliallit akornanni suliniutigineqartut aqqutigalugit kommunit suleqatigineqarneri immikkut ittumik patajaallisassallugit.
- Isumaginninnermut peqqissutsimullu suliassaqarfinni unammilligassat annertuut immikkoortortaqarfimmik ataatsimoortitamik pilersitsinerinnakkut aaqqiivigineqarnavianngitsut Naalakkersuisut erseqqissaatigissavaat. Inuiaqatigiinni pitsaasumik ineriartortitsinissamut ataatsimut akisussaaffeqarnerput immikkoortortaqarfiup ikorfartussavaa, Peqqissutsimut, Isumaginninnermut Inatsisinillu atuutsitsinermut Naalakkersuisoq Martha Abelsen (S) tusagassiutinut nalunaarut naapertorlugu oqarpoq
- Toraagalimmik ataqatigiissaagaasumillu suliniuteqarnikkut meerartatsinnut, inuusuttatsinnut ilaqutariinnullu iliuuseqarnerusinnaasugut qularinngilluinnarpara. Atugarissaarnissamik inuunermilu nalilinnik pilersitsiniarnermik suliaqarneq pillugu Namminersorlutik Oqartussat, kommunit inuillu nalinginnaasut akornatsinni tamanna ataatsimoorluta pigipput pingaaruteqarluinnarpoq erseqqissaavigissallugu, pitsaaliuinermillu immikkoortortaqarfiup nutaap tamanna peqataaffigissavaa.
Isumaginninnermut Aqutsisoqarfik nutaamik taaguuteqalissaaq tassaasoq: Pitsaaliuinermut Isumaginninnermullu Aqutsisoqarfik – Styrelsen for Forebyggelse og Sociale forhold.
PAARISA nutaaq 1. marts 2019 pilersinneqarpoq.