aatsitassarsiorneq
Pisuussutit atonerlunneqannginnissaat IA-mit sulissutigineqassaaq
Inuit Ataqatigiinnit Naaja Nathanielsen aatsitassarsiornermi isertitarineqartussat pillugit aalajangiiffigisassaattut siunnersuuteqassaaq ullumi marlunngornermi
Siumut aamma Inuit Ataqatigiit una ukiuni kingulliunerusuni avissaartuuffigingaatsiarpaat: Kalaallit Nunaat aatsitassarsiornermit isertitaqassappat aningaasat sumut atorneqassappat?
Inuit Ataqatigiinnit Naaja Nathanielsen allannguutissanik pingasunik siunnersuuteqarpoq, taakkunanilu marluk isornartuullutik.
Aningaasaateqarfimmi aningaasat katersat ileqqaakkallu erniaat taamaallaat atorneqarsinnaaneri siunertaralugu Aatsitassarsiornermi Aningaasaateqarfik 2008-meersoq pillugu allannguutissanik aalajangiiffigisassaattut siulliullugu siunnersuutigaa.
Aningaasat atorneqarnissaat
Aatsitassarsiornikkut aningaasat isertinneqartut inuiaqatigiinnut ukiuni siullerni atorneqarnissaat pinaveersaartinneqarnissaa Inuit Ataqatigiinnit siunnersuutigineqarpoq. Taamaasiortoqarpammi ajornartorsiuteqalersinnaasoq Inuit Ataqatigiinnit ernumagineqarpoq.
Naaja Nathanielsenip taamatut siunnersuuteqarnera Naalakkersuisunit isornartorsiorneqassaaq.
- Aatsitassarsiornermi Aningaasaateqarfik pillugu inatsimmi aalajangersakkap taassuma allannguuteqartinneqarnissaa Naalakkersuisut inassutigisinnaanngilaat, tassami taamaattoqassappat, ataatsimoortumik tapiissutit annikillissutaasa matussusernissaannut periarfissaqanngippat, maannakkut kinguaariit siunissami pisussanut sanilliullugu ajornerusumik inissisimatinneqalernerat tamatuma kingunerisinnaavaa, aningaasaqarnermut naalakkersuisoq Anda Uldum akissuteqarpoq.
Arlaleriarluni kinguartinneqartoq
Aatsitassarsiornikkut suli aningaasarsiortoqanngimmat suli ernumassutissaqartoqanngitsoq Anda Uldum oqarpoq.
- Ukiup siuliani ernianit annertunerusunik aningaasaateqarfimmit aningaasanik tigusisoqarsinnaasoq Inatsisartut aalajangiisinnaanerat, Aatsitassarsiornermi Aningaasaateqarfik pillugu inatsimmi maannakkut aalajangersakkani ajornartinneqanngitsoq Naalakkersuisut isumaqatigaat. Pingaartumik erniat pappiaqqani qularnaarneqartuni, soorlu obligationini 0 procentimut qanittumik annertussuseqarpata, tamannalu maannakkut inissisimaffigineqarpoq.