Pissanganartumik unammereernermi Nagdlunguak' pissartanngorpoq
Angutit arsaallutik pissartanngorniunneranni marlunnik anisitaasoqarpoq, kingusissukkut isertitsisoqarluni straffeqattaarnermilu aatsaat unammineq naammassineqarluni.
Ilulissanit Nagdlunguak' Nunatsinni pissartanngoqqippoq.
Pissartanngorniunnermi B-67-imut unamminerminni ajugaapput, straffeqattaareernermi unammineq naammassineqarluni.
Unamminermi B-67-imit Søren Kreutzmann isertitseqqaartuuvoq, unammisut minutsini 18-ni unammereersut straffesparksfeltip silataanit arsaq isertillugu.
Unamminermi immikkoortumi siullermi isertitsisoqaqqinngilaq.
Anisitaasut marluk
Unammisut 56 minutsini unammereersut B-67-imit John Ludvig Broberg toqqaannartumik dommerimit aappaluttumik nittaavigineqarpoq.
B-67 ikinnerugaluarlutik akiuulluarput, ajugaanissaallu ilimanarsimagaluarluni. Unamminerli naammassilersoq Nagdlunguamit Kunuuteeraq Isaksen arsaq qeqqanoorneqartoq siulliuffigaa, unammisut naligiitsilerlugit isertitsilluni.
Unammineq naammassilersoq B-67 qulingiluaannanngorput, B-67-mi unammisartoq Aiko Nielsen aappassaa sungaartumik nittaavigineqarnermi kingorna anisitaalluni.
Unamminerup sivitsorneqarnerani isertitat marluk
Unamminerup sivitsorneqarnerani akunnerup aappaani B-67 siuaqqipput, Niklas Thorleifsen frisparkimi toqqaannartumik kusanartumik isertitsimmat, taamaasilluni B-67 ajugaasussatut isikkoqaleraluarluni.
122 minutsinili unammisut unammereersut Nagdlunguak' isertitseqqippoq, tassani René Eriksen-Petersen isertitsisuulluni.
Taamaasilluni unammineq straffeqattaarnikkut aalajangerneqartussanngorpoq.
14-nissaa isertitseriartoqareersoq aatsaat ajugaasut nassaarineqarput, tassani Katu Madsen Nagdlunguamit straffi isertimmagu, taamaasilluni Nagdlunguak' illoqarfimminni pissartanngorniunneranni pissartanngorlutik.
Nuummiut IT-79 GM-imi bronzinnattuupput, unamminermi 5-0-mik G-44 ajugaaffigaat.
Unammersuaarneq naammassimmat toqqaasoqarpoq:
Ukiup iligiivi:
- Malik Mikaelsen - IT-79
- Aiko Nielsen - B-67
- Patrick Frederiksen - B-67
- Kunuuteeraq Isaksen - N-48
- Mika Thyssen - IT-79
- Søren Kristiansen - UB-83
- Rene Eriksen Petersen - N-48
- Nikki Petersen - B-67
- Lars Erik Reimer - N-48
- Hans Karl Berthelsen - IT-79
- Søren Kreutzmann - B-67
Akersuutillammak: Knud Petersen, T-41
Arsalerillammak: Mika Thyssen, IT-79
Arsallammak: Nikki Petersen, B-67
Pissartanngorniunnermi ima inissipput:
- Pissartanngortut: Nagdlunguak', Ilulissat
- Sølvinnattut: B-67, Nuuk
- Bronzinnattut, IT-79
- 4-nngortut: G-44, Qeqertarsuaq
- 5-nngortut: SAK, Sisimiut
- 6-inngortut: UB-83, Upernavik
- 7-nngortut: K-33, Qaqortoq
- 8-nngortut: T-41, Aasiaat