Pissanganartorsiorneq: Kielsenimut tatiginninnginneq

Inatsisartut ataatsimiinnerat Hans Enoksenip Kim Kielsenip Naalakkersuisuinut tatiginninnginnermik taaseqqusinerata kingorna unitsikkallarneqarpoq

Tunngavilersuutaavoq innuttaasut toqqissisimannginnerat aamma Naalakkersuisut taarserneqalunerisa inooqataaffigineqarsinnaannginnerat. Nikisitsiuarnerit Naalakkersuisunut akornutaapput, Partii Naleqqami utoqqaanersaq isumaqarpoq.

Aatsitassanut Suliffeqarnermullu Naalakkersuisup Erik Jensenip Naalakkersuisutut tunuarniuteqarluni qinnuteqaataata suliarineqarnerani tatiginninnginnermik taasititsinissamik piumasaqaat saqqummiunneqarpoq. Oqaluuserisassanngortinneqartoq Ukiakkut ataatsimiinnerup ulluata naggataani oqaluuserisassarpassuit akornannut ualimut ilanngunneqarpoq.

Qinigaaffimmi matumani qulingiluassaat naalakkersuisumik Naalakkersuisunit naalakkersuisumik anisoqarpoq, Naalakkersuisut allanut nuutsinneqartarneri ilanngukkaanni 14-eriarluni allannguisoqarpoq.

Unikkallatsiarneq nalunaaquttap akunnerata affaanik sivisussueqassaaq, naatsorsuutigineqarsinnaavoq, Naalakkersuisut pissaanermik tigumminniinnartinniarlugit, tatiginninnginnermik taasititsinissaq pinngitsoortinniarlugu suliaqartoqassasoq.

Hans Enoksen tatiginninnginnermik oqaluuserisassanngortitsinermini ilaatigut allappoq:

- Naalakkersuisut nunamik aqutsinerat nangiarnartupilussuuvoq. Innuttaasut aningaasatigut ulluinnarnilu atugaasigut annertuumik artukkerniarlugit aalajangertoqarsimavoq. Innuttaasunik peqataatitsinani matoqqasumik naalakkersuinikkut aqutsineq ulluinnarsiutinngorsimavoq. Nunami maani oqartussaaqataanermik aaqqissuussaqartumut tamanna naapertuutinngilaq. Qinikkatut tamanna akuersaarneqarsinnaanersoq isummerfigisariaqarparput.

Hans Enoksen aamma isumaqarpoq, inatsiserpassuit akuerineqarsimasut innuttaasut inuuniarniarnerannut eqquinerluttartut.

- Taamaammat Inatsisartuni ilaasortat sakkortunerpaamik kaammattorpavut, innuttaasut tatiginninnginnerattu Naalakkersuisut Siulittaasuannut tatiginninnginnerminnik takutitseqqullugit.

Powered by Labrador CMS