Skip to main content

Pissanganarsiartorput

Tallimanngormat arnat angutillu assammik arsarlutik unammineri aliikkutaalluaqaat. Pissartanngorniutivinnissat qanilliartorput

Ulormi unamminerit ilaat, måleqqattaarfissatut aliikkutaasussatullu naatsorsuutigineqartoq, tassaavoq SAK, Sisimiuniit, aamma N-48, Ilulissaniit.

Unamminermi tassani Linda Madsen, SAK, aamma Gerdaaraq Ingemann, SAK-miinnikoq massakkut N-48-umi arsartartoq, naapipput.

Nivissat N-48-meersut aallartilluaqaaq piareersarluarsimanerullutillu saassussinerminni utaqqimaarnerusaramik. Kukkuluttulaaraluarlutik muminnginnermi siuarsimaannavipput. Tassani Gerdaaraq Ingemann arsariaasaa ilisarnaqisoq takussaavoq. Unamminermi sunniuteqarluarlunilu takussaagami.

Akerlianik SAK-meersut pissangarpasillutillu unioqattaarput. Kukkulutorneri amerlapput saassussinermi eqqissillutik pineq ajoramik. Iluliarmiut muminnermi 14-12-imik siuarsimapput, unamminerlu taamaaginnartussaisikkoqarluni.

Taamaattorli muminnermi SAK-kut ajugaaniarlutik uterput piareersarluarsimallutillu. Linda Madsen akuunerulerpoq. Taassuma akeqqaminit tikinneqaqattaalerami ilini periarfisseqattaarpai, taamaanngikkaangallu akisussaaffimmik tigusilluni isertitsisarluni.

Gerdaaraq Ingemannili, N-48, holdimini sunniuteqarpiarunnaarpoq, naak holdikuminut ajugaarusuppasikkaluaqaluni. Marluriarluni minutsini marlunni anisitaavoq aallartilluanngitsoorlunilu.

SAK 33-23-mik ajugaavoq. Linda Madsen arsarluarnepaatut toqqagaasoq.

GSS artorsartitaasoq

GSS, Nuummeersut, Aasiammiut Norsaq HC naapippaat. GSS, pissartanngortussatut ilimanaateqarnerpaajupput, Norsaq HC-lu tassaalluni ukioq kingullermut sanilliullugu siuariarnerpaasimasutut taaneqarsinnaasut.

GSS-ikkut ajugaaniarlutik unammiuaannarput, aamma ippassaq taamaaliorput. Norsaq HC aamma ajugaaniarlutik unammipput, taamaattorli sapinngisamik målinik ikinnerpaaffissaanik ajorsarunik naammagalunikku.

Aasiammiut aallartilluaqaat, muminnginnermi siuarsimaannavikkamik. Sakkortupput, assersuilluarlutik timersortartorpalaartumillu arsarlutik. Arsarluarnerni Muusa Ostermann-Søholm aqutsilluaqaaq.

GSS, Nuummeersut, tupaqqarpasipput. Assersuinerat iluatsippianngilaq, tupaallannartumillu unioqattaarlutillu isertitseriarneri annatseqattaarput. Mianersoqqusaanerit arlallik minutsinilu marlunni anisitaanerit muminnginnermi ilisarnaatigaat.

Mumereernermili GSS-ikkut ilisarnarsipput. Arsariaasertik allanngorpaat qullasissumilu Norsaq HC-kut ajornarteqisaanik, assersuillutik. GSS-ikkut eqqissiivillutik siuariartorput, malitsigisaanillu imminut tatiginertik, katassimarpasikkaluagatik, atiaroqqilerlugu.

Norsaq HC tamaviaarput qasorpasilaalerlutillu. GSS-ikkut taarsiisussagissaaqaat arsarnertillu allangortinnagu ingerlaannarlutik. Sukakkiartorput 27 – 14-millu nuannaarutigeqisaminnik ajugaallutik. Aasiammiut aamma nuannaaqaat, tassami pissartanut ajorsaqqalaaginnarput siuariarsimanertillu uppernarsillugu. Muusa Ostermann-Søholm, Norsaq HC, unamminermi arsarluarnerpaatut toqqagaavoq.

Tallimanngornermi unamminerit inerneri kingusinnerusukkut ilanngunneqassapput:

Tallimanngorneq:
Arnat:
Norsaq HC – Kâgssagssuk ?? - ??
SAK – N-48 33 - 23

Angutit:
N-85 – Norsaq FC ?? - ??
QNQ – NÛK 15 – 39
N-48 – SAK ?? - ??
GSS – Norsaq HC 27 – 24

Arfininngornermi unamminerit aaliangiisuussaput. NÛK, N-48, SAK aamma GSS angutini medaljennanniuttussaassapput:

Arnat:
NÛK – Kâgssagssuk
GSS – N-48
Norsaq HC – SAK

Angutit:
N-85 – QNQ
GSS – SAK
N-48 – NÛK

Ataani assit takukkit

 

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER