Pissanganarluinnartoq: IA aamma Siumut ajugaassangatinneqarput

Inatsisartunut tallimanngornermi qinersinermi qinersisut 20 procenterluinnangajaat maanna kisinneqareersimalerput, maannalu pissanganarluinnarpoq kina nunatsinnut siuttuulluni aqutsisunngussanersoq.

Qinersinerit 7000 missaat nalunaaqutaq 23 sioqqullugu kisinneqareersimalerput, maannalu inernerugallartut takutippaat Naalakkersuisuutitaqartoq Siumut nunatsinni partiini 44,2 procentinik qinerneqarlutik anginersanngorumaartut.

Kisianni KNR-ip qinersivinni isumasiuinera allamut tikkuussivoq. Tassani Inuit Ataqatigiit qinerneqarpaasussatut tikkuunneqarpoq 35 procentinit taaguunneqartussatut missingerneqarmat, Siumut qinersisartut 31,2 procentiannit taaneqartussatut missingerneqartoq.

Atuaruk: Exit poll: Sara ajugaavoq

Taamaalilluni Inatsisartunut qinersinerup inernissaa suli pissanganarpoq. Aamma tamatumunnga ilutigitillugu partiit siulittaasui taakkua marluk, Kim Kielsen Siumumeersoq aamma Sara Olsvig Inuit Ataqatigiinnersoq inuttut taaguunneqarnermikkut imminnut unammimmata.

Partii nutaaq, Partii Naleraq, qinersinermi ingerlalluarpoq. Kisitsinerit maannamut piareerneqartut najoqqutaralugit partii qinersisut 11,5 procentiisa qinissavaat. Taamaalilluni nunatsinni partiit anginersat pingajorilissallugu.

Taama ingerlaannassaguni partiit naatsorsuutigisaanit ingerlalluarnerussapput.

- Inernerugallartut isumalluarnarput, angusagut pitsanngoraluttuinnarput, Partii Naleqqap siulittaasuata tullia, Per Rosing-Petersen KNR-imut oqarpoq.

Aamma partii nutaaq taanna nunatsinni tusagassiorfiit arlallit eqqoriaanerat malillugu naalakkersuisunngortitsinissami aalajangiisuussaaq Inatsisartuni pissaaneq inissinniarneqalerpat.

Kisianni qinersinerup inernivissaa suli oqaatigiuminaappoq, illoqarfiit pingaarnersaanni Nuummi qinersinerit suli kisinneqanngimmata.