Pissaanermik atuinissamut sakkunik ikiueqqaarnermillu pikkorissartitsineq
Kommunefogeditut qanittukkut atorfinitsinneqarsimasut 14-it ulluni makkunani Kangerlussuarmi ilinniartinneqarput.
Kommunefogedinik nutaanik atorfinitsitsisoqartuarpoq, taakku najugaqarfinni mikinerusuni politiitut suliaqartartussaapput.
Kalaallit Nunaanni Politiit sapaatip-akunnerani matumani kommunefogedit 14-it nunamit tamarmeersut Kangerlussuarmi ilinniartinniarlugit katersorsimavaat.
Kommunefogedit taakkut tamarmik 2020-mi atorfinitsinneqarsimapput, taakkulu ilaatigut pissaanermi sakkunik atuinissamut ikiueqqaarnermillu ilinniartinneqassapput, politiassistenit politiinngorniarfimmilu ilinniartitsisoq Alma Pedersen oqarpoq:
Kommunefogedit imatut ilinniartinneqassapput
Kommunefogeditut atorfinillaat ukiumut ataasiarluni ilinniartinneqartarput. Piginnaatitsissutit ataavartinniarlugit ukiumut minnerpaamik ataasiarluni politeeqarfiit najukkani kommunefogedinik siunersiueqateqartarput.
Pissarsiffik: Kalaallit Nunaanni Politiit
- Pikkorissaanermi kommunefogedit nalunaarutinik tigusinissamut, pissaanermi sakkunik atuinissamut, ikiueqqaarnissamut, pinerliiffiusimasunik qularnaarinissamut, nalunaaruteqarnissamut allarpassuarnillu suliaqarnissaminnut piginnaasatigut pikkorissutsitigullu ilinniartinneqassapput, Alma Pedersen politiineersoq tusagassiorfinnut nalunaaruteqarnermi oqarpoq.
- Suliaqarluartartut
Politiit naapertorlugit pikkorissaanermi anguniagaavoq, kommunefogedit tunngaviusumik ilisimasassanik kiisalu piginnaasassanik piginnaatitsissutinillu ilikkagaqarnissaat, taakkumi tunngavigalugit kommunefogeditut atorfinitsinneqarnerminni suliassaminnik isumaginnittussaammata.
Leder af Aasiaat Politeeqarfiani pisortaq politikommissæriusoq Aqqaluk Petersen pikkorissartitsinermi aamma ilinniartitsissaaq, taassumalu erseqqissaassutigaa kommunefogedit suliaqarluartartut:
- Kommunefogedit pikkorissut illoqarfinni nunaqarfinnilu toqqissisimatitsisartut, isumannaallisaasartut qanilaartuusartullu suliarisartagarpassuatsinnut sulisarnitsinnillu pingaaruteqartupilussuupput. Kommunefogedit najukkani eqqissisimasoqarlunilu ajunngitsumik pisoqarnissaanik suliaqarluartartuupput, taamalu ullut tamaasa innuttaasunut ataasiakkaanut iluaqutaasarlutik. Taamaammat pingaaruteqarluinnarpoq, taakku eqqortumik ilinniartinneqarnissaannik isumaginninnissarput, Aqqaluk Petersen oqarpoq.
Kalaallit Nunaanni Politiit siusinnerusukkut ilisimatitsissutiginikuuaat, 2021-mi aggustip aallaqqaataani kommunefogedinik katillugit 62-inik nunami tamarmi atorfinitsitsisimallutik, aatsaallu taamak amerlatigisunik atorfinitsitsisimallutik.