Pisortatigoortoq: Siumut qinersinermi ajugaavoq

Siumut Aleqa Hammond siuttoralugu marsip 12-ani 2013-imi Inatsisartunut qinersinermi ajugaavoq, maanna ukiut marluk ataallugit ingerlareersullu Siumut ajugaaqqippoq.

Partiimmi qinersisartut 34,3 procentiisa qinersineri pissarsiaraat, Inuit Ataqatigiit tulliullutik qinigaanerpaapput nunatsinni qinersisartut 33,2 procentii partiip siulittaasua Sara Olsvig siuttoralugu Inatsisartunut qinersinermi tallimanngornermi pissarsiarigamikkit.

Qinigaanerpaanut pingajunngorlutik Demokraatit inissipput qinersisut 11,8 procentiannit qinerneqaramik, Partii Naleraq 11,6 procentinit taaneqarlutik tulliusut.

Atassut qinersisartut taasinerisa 6,5 procentii pissarsiaraat, Partii Inuit siulittaasoq Nikku Olsen siuttoralugu isertitaqanngitsoorlutik 1,6 procentinit qinerneqartut.

Taama qinersineq.gl nalunaaqutaq 01:58 paasissutissiivoq.

Siumut aamma Inuit Ataqatigiit aqqanilinnik Inatsisartunut isertitaqarput. Inatsisartuni 31-nik ilaasortaqarsinnaavoq. Kisianni Siumut qinersinermi qinerneqarnerpaanerat pissutaalluni Naalakkersuisunngortitsiniarnermi isumaqatiginninniaqqaassapput. Siumut 10.102-nit qinerneqarpoq Inuit Ataqatigiit 9.776-nit qinerneqartut.

Nunatsinni qinersisinnaasut katillugit 40.423-iupput.

Aajukua qinersinerup inerneri:

• Siumut: 34,3 procentit (10.102 qinersisut)
• Inuit Ataqatigiit: 33,2 procentit (9.776 qinersisut)
• Demokraatit: 11,8 procentit (3.468 qinersisut)
• Partii Naleraq: 11,6 procentit (3.423 qinersisut)
• Atassut: 6,5 procentit (1.919 qinersisut)
• Partii Inuit: 1,6 procentit (477 qinersisut)
• Allat: 0,1 procentit (22 qinersisut)

Inatsisartunut 2012-imi marsip 12-ani qinersinerit agguataarneri:

• Siumut: 42,8 procentit (12.910 qinersisut)
• Inuit Ataqatigiit: 34,4 procentit (10.374 qinersisut)
• Atassut: 8,1 procentit (2.454 qinersisut)
• Partii Inuit: 6,4 procentit (1.930 qinersisut)
• Demokraatit: 6,2 procentit (1.870 qinersisut)
• Kattusseqatigiit Partiiat: 1,1 procentit (326 qinersisut)
• Allat: 0,0 procentit (9 qinersisut)