Pisortaq: Qimarnguiit suli pisariaqartinneqartuassapput
Angerlarsimaffinni persuttaasoqartarallartillugu, qimarnguiit suli pisariaqartinneqassapput. Angerlarsimaffimmi persuttaasarnerup kinguaariinni kingornunneqartarnerat pinngitsoortinniarlugu, Kommuneqarfik Sermersooq neqeroorutissanik suliaqarpoq.
Naalagaaffiit Peqatigiit nunarsuaq tamakkerlugu arnanut persuttaasarnerup atorunnaartinnissaanut ulloritittagaa tassaavoq ullumikkut novemberip 25-at, Persuttaasarnerli - ajoraluartumik - nunatsinni suli atorneqartarpoq.
- Angerlarsimaffinni, aammalumi nunatsinni, persuttaasoqartartillugu, qimarnguiit pisariaqartinneqartuassapput, Kommuneqarfik Sermersuumi pitsaaliuinermik immikkoortortaq aamma meeqqanut ilaqutariinnullu katsorsaavimmi pisortaq, Ellen Magnussen oqarpoq.
Kalaallit Nunaata Politiivisa 2019-imi ukiumoortumik naatsorsuinerisa takutippaat persuttaanerit 936-it 2019-imi nalunaarutigineqarsimapput. 2018-imi persuttaasimanerit nalunaarutigineqartunit 701-init 235-inik amerlanerullutik.
Saaffiginnittut upernaaq amerlangaatsiarput
Pingaartumik Nuummi corona pissutigalugu nunap upernaaq manna matugallarnerata nalaani, angerlarsimaffimmi timikkut tarnikkullu persuttaasoqartarnera pissutigalugu qimarnguinnut saaffiginninnerit amerlanerungaatsiarsimapput.
- Siornatigut takusariikkagut saaffiginnipput. Aammali inuiaqatigiinni suminngaanneerfiit assigiinngitsuniit arnat siornatigut saaffiginnissimanngitsut, qimarnguinnut siunnersortikkumallutik imaluunniit unnuiffissarsiorlutik saaffiginnipput, angerlarsimaffimmi persuttaasoqarnera pissutigalugu, pisortaq oqaluttuarpoq.
Nuummi qimarnguik upernaaq manna sumiiffinni pingasuni ornittagaqartitsivoq, arnat meeqqallu saaffiginnittut inissiffissaqarnissaat anguniarlugu.
Oqaloqatigiinnerit kipisitsissapput
Kommuneqarfik Sermersuumi Nuummi qimarnguimmi atorfeqartut maanna marluupput. Katsorsaanermi aqutsisoq aamma isumaginninnermut siunnersorti.
Arnat 48-t meeqqallu 33-it siorna Nuummi qimarnguimmi atuipput. Taakkunannga arnat katillugit sisamat ikinnerpaamik marloriarlutik 2019-imi qimarnguimmukarsimapput.
- Maanna sinaakkusiussanik suliaqarpugut, arnat takkuttartut ikiorneqarnissaannut neqeroorutinik suliaqassalluta. Qimarnguiup qimareernerata kingorna oqaloqateqartarnerit ingerlatiinnarneqarnissaannut neqeroortalerusuppugut, pissutsit qanoq innerinik malitseqartitsilluta. Neqeroorut ilaqutariinnut tamanut sammissaaq, arnaq, aappaasoq meeqqallu oqaloqatigineqarsinnaassallutik, Ellen Magnussen oqaluttuarpoq.
- Taama neqerooruteqarnitsinni persuttaasarnerup kinguaariinni ingerlateqqinneqaratarsinnaanera pinaveersaartinniarparput, oqarpoq.
Neqerooruteqalersaarnermi atorfiit marluk nutaat inuttassarsiorneqassapput, tassa terapeuteq aamma perorsaasoq.